August 25 leh September 8 inkara India ram hmun hrang hranga hman, National Forthnight on Eye Donation kharna chu vawiin khan I&PR Auditorium ah neih a ni a. Health Minister Pu Lalrinliana Sailo in a hmanpui.

Eye Donation Forthnight hiIndiaram pumah kum tin hman thin a ni a. Hei hian a tum ber chu mitthlak (eye transplant) mamawhna sang lutuk phuhru thei tura mit pek pawimawhna mipui te hnena inzirtir a ni. Khuallian Pu Lalrinliana chuan mit petu chhungte hnenah midangte tana malsawmna ni tura an chhungte thi tawh mit phal taka an pek avangin lawmthu a sawi a. A mamawh tu te tan mit petu te hlutzia sawiin amah ngei pawhin a mit khing khat neih chhun chu midangte tan a pek tawh thu a tarlang a.  Health department in tun hnaia kawng hrang hranga hma a sawn dan sawiin Pu Rinliana chuan  Aizawl Civil Hospital in Eye Bank a neih hnua mit thlak  theiha a lo awm chu department tan leh ram tan hmasawnna lawmawm tak a ni, a ti.

Eye Donation Fortnight kharna inkhawmah hian Donor chhungte hnenah Khuallian chuan certificate a hlan a. Dr. K.L. Remsanga, Head of Eye Department Civil Hospital, Aizawl hnen atangin Mizoram Eye Bank dinhmun tlangpui ngaihthlak a ni a. Kum 2008 atanga 2013 thlenga mit pe tura intiam mi 3602 an awm tawh a. Mit petu mi 77 awm tawhin mitthlak 127 an awm tawh a ni. Kum tina mit(cornea) lak khawm tura target neih zat chu 30 a nih laiin September 2009 - March 2010 ah cornea 16 lak a ni a. April 2010 - March 2011 ah 28, April 2011 - March 2012 ah 28, April 2012 - March 2013 ah 50 leh April 2013 - August 2013 ah 32 lak a ni tawh a ni.