Fisheries Department, Serchhip District buatsaihin nimin nileng khan Serchhip DC Conference Hall-ah Fisheries Department kaltlanga NLUP 2nd Phase hnuaia Sangha khawi tura thlan chhungkaw 100 tan training buatsaih a ni a. District Bawrhsap Pi Juhi Mukherjee, IAS chuan he training hawnna inkhawm hi a hmanpui a ni.

Pi Juhi Mukherjee chuan Sangha hi sa hrisel, mihring te tana tha leh tangkai anih mai bakah a thatna hriatchhuah belh zel anih avangin a hralhna pawh a tha chho zel a, Sangha dil siam pawh an pung chho zel a ni a ti a, Sangha khawi tu te chu thahnemngai tur leh hlawhtling ngei turin a fuih a ni.

He inkhawmah hian Pu Robert C. Lalhmangaiha, MCS, Nodal Officer NLUP chuan NLUP 3rd Phase beneficiaries thlan fel an nih tawh thu leh NLUP Implementing Board pawmpuina nghah mek anih thu te, 4th Phase dawng tur pawh thlan fel anih tawh thu leh NLUP Implementing Board a theh luh tura buatsaih mek a nih thu a sawi bawk.

Fisheries Department hian Serchhip District-a NLUP 1st Phase ah chhungkaw 81 hnenah tanpuina pek tur an pe kim tawh a, nimin khan 2nd Phase hnuaia thlan chhungkaw 100 hnenah Bank-a Rs. 50,000 zel an lak theih nan Bank Draft pek vek an ni a, he pawisa hi vawiin hian an account-ah theuh thun sak a ni.

Nimina tanpuina dawng thei tura tar lan te hi Serchhip Constiteuncy ah mi 53, Tuikum Constiteuncy ah mi 26 leh Hrangturzo Constiteuncy ah mi 21 an ni.

Training hawna inkhawm hi Pu Sp Singh, DFDO in a kaihruai a, beneficiary te hi NLUP kalphung, Sangha dil siam dan, Sangha chaw pek dan leh dila Sangha chhuah dan te, Sangha chaw siam dan te leh thil pawimawh dangte zir tir an ni.