Tuichangral South Group YMA Conference vawi 43-na Mualcheng khua-a neih mek chu vawiin khan Parliamentary Secretary to Chief Minister Pu Lal Thanzara’n khuallian niin a hmanpui. Conference hi February ni 26 khan tan a ni a, February 28 zan hian a tiak ang.

Pu Lal Thanzara chuan ram leh hnam humhalh tur chuan langsar taka min nektu mai ni lovin lang mang lova chhung lam leh pawn lama min dotu te lakah kan inhumhim a tul a ni, a ti a. Mizo mipuite behchhana ram dang mi, Mizoram chhunga sumdawngte hian kan ram an run mek a ni, a ti. Parliamentary Secretary chuan Central YMA kumpuan lo neih tawh thin ruihhlo do, intodelh, faina kum leh a dang te hmanga Mizo hnam hmasawnna tura YMA-in tan a lak dan sawi langin a bawhzuina kawngah YMA kuta dah mai lova, kan vaia mawhphurhna a nih hre thar leh turin mipuite a sawm a. Sorkar hmalakna tipuitling tura YMA tangkaizia sawiin Pu Lal Thanzara chuan NLUP dawng tur thlan kawngah te, Electoral Roll dik neih chungchangah te, tuihna kang chat zel tur ven kawngah te leh thil dang tam takah YMA chu sorkar tha tichaktu leh sorkar kut ke ber a ni, a ti. Zonunmawi tungding tura Group, Sub Headquarters, Central YMA conference leh khawmpui dang te kaltlanga zirtirna tha tak tak an pek thin te hre renga, ngaithla liam mai lo turin leh heng khawmpui neih thin te hian hmasawnna a thlen ngei theih nan a ngaithlatu mipui lamin a zawm kawngah tan la thar leh turin Pu Lal Thanzara chuan kalkhawm te a sawm bawk a ni.

Tunhnaia Mizo panga helpawl nia inchhal ten an rukbo chungchangah Parliamentary Secretary chuan pawi a tih takzet thu leh chhuah an nih thuai theih nan sorkarin theihtawp chhuaha a beih mek thu a sawi a. Heng rukbo te ngaihven tur hian sorkar official te leh Central YMA hruaitu te an thang mek thu sawiin mipui thinrim pawh lo inbengdai tur leh an chhungte pawhin dawhthei taka sorkar hmalakna lo ngaichang hram turin a ngen a ni.

He huna thusawitu dang Central YMA Assistant Secretary Pu RL Rindika pawhin ram leh hnam humhalh tur chuan chhungrila min eichhetu ruihhlo do kawngah tan lak a tul thu leh mahni intodelh mipui ten kan zir thar a tul thu a sawi a. He hnam tlemte hi inla hrang tham kan awmloh zia hria a Mizo hnam nihnaah chiang tur leh lungawi turin mipuite a sawm a, zohnahthlak zawng zawng te pumkhata kan awm hi Central YMA duh dan a ni, a ti bawk.

Tuichangral Group YMA huamchhungah hian Branch 17 an awm a. Nizana rorel inkhawm an neih a agenda an passed zingah Group huamchhunga Primary School zirtirtu indaihlohna hmunah sorkarin zirtirtu a dahbelh thuai theih nan Group hruaitu ten hma la rawh se, tih te; North Vanlaiphai Police Station-ah SDPO dah tura sorkar ngen ni rawh se tih te; North Vanlaiphai Public Health Centre-ah Doctor dah thuai a nih theih nan tan lak ni rawh se tih te a tel a ni.

Tuichangral Group YMA Conference chuan “February ni 19, 2013-a Dampa Tiger Reserve chhunga hnathawk mi 6 rukbo an ni hi Tuichangral South Group YMA chuan kan dem takzet a, Mizoram chhungah inrukbona hi thleng tawh lo se, a rubo tute hian intiamkamna awm lovin an mi rukbo te hi chhuah nghal turin kan phut a ni,” tih resolution an passed bawk.

Pu Lal Thanzara hian Tuichangral South Group YMA hnuaia YMA Branch 17 te hnenah Silpauline a sem theuh bawk a ni.