Central Silk Board (CSB) hnuaia Research Extension Centre(REC) Aizawl leh District Serculture Officer, Serchhip bultumin vawiin chawhma khan New Serchhip YMA Hall-ah Serchhip khaw chhehvela khaw thlanchhuah pathum - Keitum, Chawilung leh Chhiahtlang khua a pangang khawitu chhungkaw 100 hnenah chhawmdawlna hmanrua chi hrang hrang pek an ni a, he hun hi District Bawrhsap Pu P.Lalchhuanga'n khuallian niin a hmanpui a ni.

Khuallian Bawrhsap chuan tanpuina dawngtute chu an vanneihzia hre tura chahin, tanpuina awmzia hrechiang turin a hrilh bawk a, kan tihtheihloh tihhlawhtlin theihna tura midangte min puihna hi tanpuina chu a ni a, chuvang chuan anihna ang taka hman a tul a ni a ti a, tanpuina awmzia diktak hrechiang tan chuan holam taka hman ral mai mai phal chi anih loh thu a sawi bawk.

Bawrhsap chuan Sawrkar atanga tanpuina leh chhawmdawlna kan dawn te kan tihhlawhtlin  loh hian sawrkar hlawhchhamna nilovin min duhsaka min tanpui duhtute tibeidawnga an rilru tih nat sak tu kan ni a, a tihlawhchhamtu tak zawk chu a dawngtu mipuite hi kan ni tiin hun lo kal leh zel turah hetiang tanpuina hi  a awm reng dawn lova, dawng duh mahse dawn theih ani tawh dawn lo ani tih sawiin vanneihna an tawn hun lai a hlawhtlinpui theuh tum turin beneficiary te chu duhsakna a hlan nghal bawk a ni.

Beneficiary te pawhin lawmthu sawiin Sericulture Department behchhan tur an nei chu vannei an in tih thu an sawi a, theihtawp chhuaha sawrkar atanga malsawmna an dawn te hlawhtlin pui ngei an tum thu sawiin an infuih tawn nghal bawk a ni.

Thusawitu dang Pu BN Chowdhuri, Scientist 'C', CSB pawhin thusawiin 11th Five-Year Plan chhunga an tih that phawt chuan 12th Five-Year Plan hnuaiah pawh he programme zar hi an la zo  leh thei dawn ani tih sawiin, State dangte tluk ve thei ngei tura tan la turin pangang khawitute chu a fuih a ni.

Central Silk Board hnuaia REC hmalakna "Cluster Development" Programme hi Mizoram Sawrkar hnuaia Sericulture Department chuan nasa taka hma lo lakpuiin, he programme hnuaia beneficiaries thlanchhuahte hi Pangang vulhna tur In (Rearing House) pawh an lo sak sak tawh a, tun tuma pangang khawina tura mamawh hrang hrang an sem hi chhungkaw pakhat tan :

1)      Plastic Rearing Tray
2)      Rearing Net (pangang ek then faina tur)
3)      Foam Pad (pangang note mamawh boruak hnawng siamna tur)
4)      Plastic Mountage
5)       Silpauline
te niin pangang khawina In (Rearing House) sak tanpuina hmang tha zual thlanchhuah mi 15 hnenah Solar Lamp pek theuh an ni bawk. Pangang khawi tanpuina dawngtute hi Chhiahtlang atangin chhungkaw 55, Chawilung atangin chhungkaw 28, Keitum atangin chhungkaw 17 niin an vaiin chhungkaw 100 an ni.

Vawiin tanpuina sem inkhawm hi Pu C.Lalrinawma DSO, Serchhip District-in a kaihruai a, Pu V.Zothansanga SPO, Serchhip District-in report  a pe a, heng tanpuina te hi Khuallian District Bawrhsap Pu P.Lalchhuanga leh Pu Robert C.Lalhmangaiha MCS, Nodal Officer NLUP Serchhip District ten a dawngtute hnenah hian a sem a, hei bakah hian Pangang khawi chungchang lantirna Exhibition changtlung leh bengvarthlak tak neih a ni bawk.

Attachment