736/2026-2027

Dated Serchhip, the 26^th May 2026: Vawiin khan Serchhip Power & Electricity Department chuan Surya Ghar Muft Bijli Yojana chungchangah Awareness Programme, Serchhip DC Pisapui Hall-ah an buatsaih a, mahni in atanga, ni zung chakna hmanga kawlphetha thar chhuah dan chungchang inhrilhhriatna hun hman a ni.

Er. Lalramnghaka, Executive Engineer, P&E Serchhip chuan he Scheme thil tum tiangpui sawiin, India ram puma mimal In (household) vaibelchhe khatah Rooftop Solar System (RTS) bun tum a nih thu a sawi a. Mimal chenna in chunga Solar hmanga power siam chhuah chuan nasa taka Electric Bill a tih hniam mai bakah, hman sen loh power thar chhuah a níh phei chuan, hman bang chu P&E power supply line-thlunzawmah inthawn chhuakin, unit khat zelah Rs 4.73-in P&E department ten an leisak leh thin thu a sawi a. Tun dinhmunah Mizoram pumah RTS hmang mi 1086 awmin, Serchhip district-ah mi 13 chauh an la awm thu sawiin, tan lak a ngaih thu a sawi. 

P&E Serchhip SDO Pu H. Zoramthanga, Sub Station SDO Pu PC Lalremruata leh Thado Greentech leh Swastik Enterprises ten RTS chungchang sawizauna an nei bawk a. Mizoramah RTS khawl bun thei, Govt. Empanelled Vendor mi 20 vel an awm tawh thu te, sum lama harsatna neite tan Loan hmanga tíh theih a nih thu te, khawl bunna man hi state leh central sawrkarin tumpuiin subsidy thahnem tak an pek thute ngaihthlak niin, Solar Roof Top lo hmang tawhtu Consumer-te hnen atangin RTS an hman hnua Bill an chawi tlem dante leh, RTS ti thar ve duhte tan an tawnhriatte sawina hun hman a ni bawk. 

Vawiin hun hmannaah hian Serchhipa sawrkar department hrang hrang aiawhte, khawtlang hruaitute, NGO leh Consumer te kalkhawmin, chawhnu lamah sawi hona hun hman a ni bawk. 

RTS hi Online-in pmsuryaghar.mizoram.gov.in leh pmsuryaghar.gov.in ahte dil theih a ni a, diltu chu India ram chhunga cheng, electric consumer ngei nih a ngai a; khawl bunna hmun tur hi chenna in-ah ngei a nih a ngai bawk a ni.