Vawiin chawhma dar 11:00 khan Serchhip District Additional DC Pu VL. Remliana, District Bawrhsap charge la mektu kaihhruainain, Serchhip chhehvela ram kang nasa lutuk thelh dan tur ngaihtuahin Emergency meeting koh a ni a, he meeting-ah hian Village Council leh YMA te bakah department kaihhnawih thenkhat te koh an ni.

District Bawrhsap hna chelh mektu Pu Rema chuan, Serchhip district chhunga hmun hrang hrangah kumin hian sawrkarin lo hal hun a tuk chhung leh April thla chawhma lam thleng kha chuan ram kang sawi tham a awm mang lova, sawrkar leh khawtlang hotutte an lawm hman hle tawh laiin, hetia tlaikhawhnua kangmei a chhuak nasa viau mai hi a pawi hle a ni tiin, ram kang pawizia hi mitinin kan hriatchian lehzual a tul hle a ni a ti.

Meeting thu chhuak ang chuan vawiin chawhnu dar 02:00 atang hian Serchhip chhehvela ram kang hmun hrang hranga mite thelh turin, VC leh YMA ten khawtlang hnatlang ko sela, tin sawrkar hna thawk mipa zawng zawng te pawh, office chhuahsana hnatlang vek tura tih an ni. VC area hrang hrang te hian innghahkhawmna hran siamin chan an insem ang a, kangmei chhuahna hmun hrang hrang te an bawh dawn a ni. Ruahman lawk ang chuan zaninah thelh mih theih a nih loh pawhin naktuk lamah sawrkar pisa te kharin khawnawt hnatlang koh chhunzawm nise an ti bawk. Hnatlanga chhuak te phur khawm tur hian department hrang hranga motorte pawh koh khawm an ni a, tin innghahkhawmna hmunpui ber Sailiamkawna First Aid Duty turin Doctor leh Nurse te pawh ruat an ni.

Tun hnai ni li nga chhung lek hian Serchhip leh Keitum inkar NH-54 kawng chhak leh thlang lam te, Bawngchawm ram leh Khiangzawl ram te mai bakah, Serchhip leh Thenzawl inkar, Mualvawm leh Kawlri ram te chu a kang nasa hle a, chhungkaw tam tak huan thlai leh bungraw hlu tak tak te a kang chhe hnem hle tawh a ni.

Attachment

  • Loading attachment...