Vawiin khan DRDA chuan Aizawl District chhunga VEC-te tan MGNREGS hnuaia sum vawnfel dan (accounting procedures) inzirtirna hun I&PR Auditorium-ah a buatsaih. He training hawnna hun a Khuallian Pu R. Lalvena, Secretary chuan VEC te chu an hnaah rinawm turin leh belhchian dawl taka thawk turin a chah a, training hlawk thlak tak an neih a beisei thu a sawi bawk.

He huna Khualzahawm Pi K. Lalrinzuali, Joint Secretary, Rural Development Department chuan MGNREGS in a tum ber chu inhlawhfakna siam anih angin a thlawn a dawn mai tum lova, thawhrim hlawh ngei lak a nih theih nana mipuite insiamthar a ngai a ni, a ti a. VEC kalkhawmte chu hna awlsam ringawt zawnglo turin a chah bawk a. MGNREGS hnuaia kawng laih a tam tawh em avangin tun achinah chuan kawng laih bakah hna dang ngaihtuah a tul dawn tawh thu a sawi bawk.

Training hi session hnih a then niin, session hmasa zawk hi Pu David Lalthantluanga, PD & DPO, Aizawl District chuan kaihruaiin, chawhnu session hi Pi Esther Lalhlimpuii, APO(M), DRDA in a kaihruai a. Accounts vawnfel dan inzirtirna hi Pu F. Malsawmtluanga, Accounts Officer, DRDA in hmangin, practical session neih a ni bawk.