Vawiin chawhma dar 11:00 khan Serchhip Bazar ah Rastriya Ekta Diwas (National Unity Day) leh Rashtriya Sankalp Diwas (National Resolution Day) a ruala hman a ni a, Pu Chuauhnuna, MCS, Addl DC chuan kaihhruaiin, Pi Sangchhin Chinzah, DC kaihhruaiin kalkhawm ten thutiam an nei.

Pi Sangchhin Chinzah chuan, India ramin zalenna a neih chhoh laia Princely States 550 chuang zet te huikhawm a, rorelna nghet tak pakhat hnuaia kuahkhawm hna hautak leh harsa tak hlawhtling taka thawktu, hruaitu ropui Sardar Vallabhai Patel, Union Home Minister hmasa ber leh Deputy Prime Minister hmasa ber ni bawk; piancham 31^st October chu kum 2014 atang khan ram pumah Niational Unity Day atan hman tan a ni a, vawiinah pawh he ni hi Serchhip District chuan kan hmang ram chhung hmun dangte rualin kan hmang ta a ni. Chutiang bawkin 31^st October hi India ram Prime Minister atana hmeichhia kan neih hmasak ber Pi Indira Gandhi boral champha a lo ni ve bawk a. Chumi denchhen chuan Ram tana intiamtharna ni (National Resolution Day) pawh kan hmang nghal a ni, a ti a. Inpumkhatna chu ram chakna hnar, hmasawn zelna tura thil pawimawh ber pakhat a nih zia kan hriata, inpumkhatna ngaipawimawh deuh deuh a tul zia sawiin, ramin hma a sawnna kawngah mitinin mawhphurhna kan neih avangin ram tana intiam tharna, inpek tharna, ngaihtuahna fim nei chunga ram tana inhlan thar zel a tul tak zet thu a tarlang bawk. Pi Sangchhin Chinzah kaihhruainain vawiina kalkhawm te hian Ram Inpumkhatna Thutiam an nei nghal a ni.

He ni pual hian Serchhip Government High School zirlai naupang te leh JM High School ten Rally an nei a, heng School pahnih te hi Serchhip Bazar ah intawk khawmin a hmanna hun hi neih chhunzawm nghal a ni.

Vawiina heng ni pawimawh pahnih hmannaah hian Serchhip kiang Dawngzawla awm 159^th Battalion Border Security Forces atangin Battalion 2^nd in Command Pu Binner Paul leh sipai 30 rual zet ten he hun hi an rawn hman pui a, District official pawimawh engemawzat an tel bawk.