Vawiin chawhma dar 10:00 khan Serchhip Hmar Veng YMA Hall-ah Rastriya Krishi Vikas Yajona (RKVY) Scheme chungchangah Awareness Campaign neih a ni a. He hun hi Pu Lalhmangaiha, District Horticulture Officer chuan a kaihruaiin Serchhip leh Chhiahtlang khua atanga Loneitu thlan bik 40 te hnenah Pu Ramtharnghaka, RKVY Field Executive chuan zirtirna a pe a, zawhna leh chhanna hun pawh hman nghal ni.

RKVY Scheme hi Central Scheme niin Ministry of Agriculture and Cooperations enkawlna hnuai a awm a ni a. He scheme hnuaiah hian loneitute chuan an thlai thar chhuah a lo pun theih nan tanpuina kawng hrang hrangin an hmu thei a. Thlaichi, bungrua leh huan enkawlna atana khawl te man tlawm zawka pek chhuah theih an nih bakah loan pawh pawh pekchhuah theih an ni bawk a ni.

He Scheme hnuaiah hian loneitute chu Group-ah thenin a huhova hna thawhtira indawmkangtawn tura kaihhruai tum a ni a, account pawh group member zawng zawngte tan joint account pakhat hawngin Self Help Group kalphung anga her rem a kalpui ve tum a nih thu a enkawltu turte chuan an sawi bawk.

RKVY Scheme-in a tum ber chu Agriculture lama ram pum dehchhuah kum khat chhunga za a pali (4%) tala tihpun a ni a. A scheme pawh hi a huamzauin hlawm hrang panga laiah thensawm leh a ni a, vawiina loneitu lo kal khawm te hi ‘National Vegetable Initiative for Semi Urban Clusters’ chungchang zirtirna pek an ni. Mizoramah chuan he Sub-Scheme kalpui tur hian Kolkata lama hmun nei India Grameen Society chu Project Implementing Agency chu ruat niin Nodal Agency atan Mizoram Horticulture Department chu ruat an ni bawk. Anni pahnih hian loneitute hi lo neih dan kalphung tha zawk leh kumhlun zawk hmanga thlai thar tam zawk dek chhuak thei turin, awmze nei taka kaihruaiin an vil dawn a ni.