Vawiin chawhma dar 11:00 khan NLUP Conference Hall-ah Pu P.L. Thanga, Vice Chairman, NLUP Implementing Board hovin hlawk zawka NLUP Agarbati Stick siam thlangtute hmalakpui dan tur sawiho a ni.

Pu P.L. Thanga chuan Mizoram Chief Minister in NLUP a Agarbati Stick Making Trade thlangtuten hlawkzawk leh eizawnna tling ngei tura an trade hlawhtlinpui dan tur a ngaih pawimawh avangin meeting hi koh anih thu a sawi. Hemi atan hian Pu Kamesh Salom, Director of National Bamboo Mission leh Pi Sangeeta Agastay, Cluster Expert te chu chah chhuah an nih thu a sawi bawk.

Pu Kamesh leh Pi Sangeeta te chuan vawiin meeting a tel Forest Department hotute, Industry Department hotute leh NLUP Implementing Board Official te chu mau hmanga eizawnna awm thei chi hrang hrang Power Point hmangin an entir a, a bik takin Agarbati Stick siam chungchanga tul leh mamawhte an sawipui bawk.

Meeting chuan Forest Department in Mizoram District hrang hranga mau tamna khua leh engzat nge awm thei tur lo en chhuak se, chumi zawh ah a kal zel dan tur ngaihtuah ho leh nise tih an rel a, phailam expert te hi vawiin lamah Industrial Growth Centre enin, tlai lamah Agarbati Stick Making Trade NLUP a thlangtute kawm turin an rel bawk a ni.

Expert’s te hi Forest Department leh Industry Department te nen Seling, Sesawng leh Khawruhlian ah kalin mau hmun an thlir anga, Village Level NLUP Monitoring Committee te an kawm bawk ang.