Vawiin Mizoram Remna ni champha vawi 30 na hi Serchhip Disrict ah Serchhip Sub Headquaters YMA kaihruainain hlim taka hman a ni a, Serchhip khawpuiah chuan zingkarah Remna ni Kawngzawh neih niin Chawhma dar 11:00 a.m ah a lawmna inkhawm DC Conference Hall ah neih a ni a. Serchhip Town Area chhunga Home panga ah leh Hospitalah tanpuina sem a ni bawk.

Zingkarah hian Serchhip Bazar leh AOC inkar kawngpuiah thlan chhuah bik mi 300 vel ten Remna kawng zawh neiin Remna hlutzia an au pui a, Branch hrang hrang aiawh leh Remna ni Organizing Committee member te, Sub Headquarters YMA hruaitute, chanchinbumite an tel a, a kalte hnenah hian Remna Ni T-Shirt pek vek an ni. He mi rual hian Serchhip Town chhunga Home panga leh Hospital pakhat, heng; Old Age Home, Zoar Deprived Children Home, Shalom Special School, Unity Orphanage Home, Adult Rehabilitation Centre, Chhiahtlang ah leh JN Hospital (District Hospital) Serchhip ah te tanpuina Rs 3000 theuh pek a ni.

A lawmna hunpui ber hi DC Conference Hall ah neih niin he hunah hian Addl. DC Pu VL Remliana chu khuallian a ni a, Pu R. Sanghmingthanga, President Sub-Headquarters YMA in a kaihruai thung.

Chairman Pu R. Sanghmingthanga chuan, vawiin hi ram tana ni hlu bik, kan ram mipuite nunkhua a tha zawnga a inthlak danglamna ni, Mizo hnam awm chhung zawnga dai tawhlo tur ni a nih avangin a hlu a, keini vawiina he rama cheng mekte hian kan ngaihluin hlim leh uar takin kan hmang thin tur a ni a ti.

Khuallian Pu VL Remliana pawhin, ramin muanna boruak a neih loh chuan hma a sawn thei lova, ram buai hnuaiah chuan mi hausa leh miretheite pawhin nun hrehawm tak an hmang za thin, tin Mizoram leh India sawrkar in Remna an ziak hi zaah za in a hlawhtling tih theih a ni a, ram dang hmun dangah chuan hel leh sawrkar inremna te a hlawhtling mawh em em thin a, hel tenau dang a hring chhuak chawk a ni. Kan ramin heti tak maia Remna thuthlung kan tihlawhtling thei hi kan ram hruaitute thawhrah chu ni bawk mahse Pathian thlarauvin Zoramah remna a awm tlaitluan theih nana kan hotute a chenchilh reng vang a ni, a ti bawk. He hunah hian Political Party hrang hrang aiawh ten thusawina hun an hmang bawk a, zaithiam, lamthiam leh fiamthu thiam ten hun an hmang bawk. Remna ni puala Essay inziahsiaka lawmman dawngtu te hnenah khuallianin lawmman a sem bawk a ni.

Vawiin remna ni hi Serchhip District chhung hmun dang dangah pawh hman a ni a, Tuichangral South Group YMA buatsaihin N. Vanlaiphaiah hman niin Pi C. Laltleipuii, BDO E.Lungdar chu khuallian a ni a, Vantawng Group YMA buatsaihin Thenzawlah hman ni bawkin hetah hian Pi Lalnunmawii, SDO Civil a ni thunga, Bungtlangah chuan Joint YMA bul tumin hman a ni thung a, Serchhip BDO Pu Vanlalrova chu khuallian a ni. Tawi Group YMA ruahmanin Lungphovah Remna ni hi hman a ni bawk.