Vawiin chawhma dar 11:00 atang khan YMA Sub-Headquarters Lunglei kaihhruaiin sawrkar department, political party leh tlawmngaipawl hrang hrang ten Lungleia Saikuti Hall-ah Remna Ni champhaphak 30-na Pearl Jubilee lawmna a huhoa hman a ni a. YMA Sub-Headquarters Lunglei President leh Remna Ni Lawmna Organising Committee Chairman ni bawk Pu R. Lalnunthara’n a kaihruai a, Rev. Dr. C.L. Hminga chu Khuallian a ni.

Rev. Dr. C.L. Hminga chuan remna tello chuan muanna a awm theilo a, hmasawnna a ti bahlah, a ti a. Mizoram pumah a huhoa Remna Ni kan lawm theihna tura hmalatute tlawmngaihna chu a lawmawm tiin thalai chhuan lo awm zel tur te pawhin tlawmngaihna an neih zel a beisei thu a sawi. Ram ralmuang ber tih a puan thin kan ni chu a lawmawm hle laiin lungawilohna lantira khawtlang nunphung tikhaihlak khawp a, thil kal lai dan chah tumna a lo awm thin chu a pawi in mahni hmasialna leh duhamna avang a ni tiin, remna tluantling nei turin mi zawng zawng kan pawimawh a ni a ti.

Lunglei DC Pu Abhijit Vijay Chaudhari, IAS chuan rambuai nih chu a hrehawmin a manganthlak a, chu chuan remna leh muanna hlutzia a tarlang, a ti a. Remna hian kan thinlungah hmun sang ber chang fo in, pawl hrang hrang inkar, khawtlang, nitina kan hnathawhnaah te leh kan chhungkua theuhah remna hian ro rel se a ti a. Remna chu a hlu in, a man a tam a, tiderthawng leh tichhetu ni lovin, a vawnghimtu leh midangte remtu ni zel turin Remna Ni lawmnaa kalkhawmte chu a ngen a ni.

Programme tan hma hian Royal Knights kaihhruaiin two-wheeler Peace Rally neih a ni a. Remna Flag pawhparh a nih bakah remna thuchah sawi rual leh martarte sunna hun hman a ni. BJP, INC, MNF, MPC leh ZNP aiawha thusawi te chuan a huhoa Remna Ni lawm theih a ni chu lawmawm an tih thu an sawi.

Attachment

  • Loading attachment...