Vawiin chawhma dar 11 : 00 AM khan Multipurpose Hall, Council Vaih, Siaha-ah Mizoram “Remna Ni” chu ropui leh urhsun taka lawm a ni.

He Ni lawmna inkhawm hi Pu T.Chatlua, President, M.T.P. General Hqrs, Siaha chuan a kaihruai a, Pu R.T.Zachono C.E.M., M.A.D.C. chu Khuallian a ni. Pu N.Chakhai, Additional Deputy Commissioner, Siaha District chu Khualzahawm a ni.

He Ni hmanna-ah hian Rev. Dr.Lai-u Fachhai, Moderator, ECM Hqrs chuan hunserh hmangin YMA Siaha Group ten hawnna hla an sa a, Remna Ni puala thutiam sawirualna Rev. R.Lalsiamliana, Presbyterian Church of Mizoram, Siaha Bialtu Pastor kaihhruaina hnuaiah neih a ni bawk. He Ni hmanna a Khuallian Pu R.T. Zachono, CEM, MADC chuan thu sawiin, kalkhawmte chu remna siamtu ni theuh turin a chah a. Pathian nen kan inremna tur leh mihringte inkara remna a awm theih nan Pathian fapa chu he khawvelah hian a lo kal a ni, tiin Juda te pawhin remna leh duhsakna inhlanin “Shalom” an ti thin a ni,ati bawk. Inremna a awm loh avanga khawvel ram hrang hrang ten harsatna an tawh te pawh sawi langin inremlohnaah chuan zalenna a awm thei lova remna hi aman a to hle a pawisa-a lei theih pawh a ni lo, ti bawk.

Mizoramin rambuai kan nih chhung khan mipuite nun chuan awmzia a nei lova kan nun a thim hle a ni ,tiin he remna kan lo neih theih nan hian kohhran hrang hrang ten theih tawp kan chhuah a ni ,a ti . Mizoramin remna kan neih theih nan hian thil pawimawh pathum a awm a, Mizoram mipuite hmakhua ngaihna avanga India sawrkar hmalakna leh Ramhnuai Sawrkar M.N.F. te hmalakna leh Mizoram-a Sawrkar Congress hmalakna te avangin Remna tluantling kan lo nei thei ta a ni, ati bawk. Tunah chuan India rama State ralmuang ber te zinga mi kan ni a, hmasawnna chi hrang hrangte pawh hi Pathian malsawmna kan dawn a ni, tiin Remna leh Muanna a awm zel theih nan theihtawp chhuaha tan la zel turin kalkhawmte chu a chah a ni. He Ni hmanna a Khualzahawm Pu N.Chakhai, Additional Deputy Commioner pawhin thu sawiin Remna Ni lawma lokal khawmte hnenah lawmthu a sawi a, Remna hi a hlu a hel pawlte pawhin an chanvo diktak hmuh an duh avangin helpawl an din thin a ni, ati a. Rambuai lai nun hrehawm zia leh mipui mimir nun a chepzia tarlangin, khualkhua a zin chhuah dawn pawhin phalna lak a ngaih thu leh vawi tam tak Check an tawh thin thu a sawi a. Remna ti chhe thei zawng a che te chu do tlat turin kalkhawmte chu a sawm a ni. Remna kan neih veleh hmasawmna chu a zuan in a zuang ani tiin tunah chuan ei leh bar zawnna kawngah pawh awlsam zawkin ei kan zawng thei tawh a ni, a ti. Remna awmlohna ah chuan mihring kan thla a muang thei lova chuvangin he remna kan neih hi theihtawp chhuahin i humhalh tlat ang u a ti bawk.

Hnamlam hmuhnawm tak tak MTP Hqrs leh M.CH.P Hqrs Siaha ten an entir a, Programme karlakah hian zaithiam ten zaiin mipui an awi thin a,thusawi tawi heng MDCC,BJP,MNF,MDF leh ZNP aiawh ten an nei a, he Ni puala intihsiakna hrang hrang Lawmman semna Pu Israel Chozah, General Secretary, M.T.P. General Hqrs chuan neiin Essay Competition HSS leh College zirlaite puala neih-ah lawmman 1. Joel Mychhua Nohro B.A., 2. Nohro Chhuatlo, BSc leh 3. Vanlaldawngkima B.A. te hnenah hlan an ni a, Painting Competition Primary leh High School level-ah 1. HC Lalhruaitluangi, CL-IX leh 2. Lalrindika, CL-IV leh 3. Vanlalthapuia, CL-X te hnenah hlan an ni a, Marathon Race-ah lawmman 1. KL Benjamin, Meisavaih ‘W’ 2. Veto Beirahmo Chozah College Vaih 3. Ismael Azyu Meisavaih ‘E’ Remna Ni lam hawia Chanchinbu thu ziaktha thlanna ah 1. Chhim Aw, 2. Siaha Post, 3. The Times of Maraland te thlan an ni a, lawmman-ah tangka fai Rs 3000, Rs 2000 leh Rs 1000 theuh pek an ni. Lawmthu sawina Pu Pheiki Solo, Sr. Vice President, MTP General Hqrs, Siaha chuan a neih hnu-ah Rev V.Biaknunsanga, BCM Siaha Pastor Bial chuan Tawngtaina neiin he Ni hmanna hun hi a khar ta a ni.