Ram chhung hmun dangte rualin vawiin chawhma dar 10:30 khan Serchhip Field-II ah Serchhip District Bawrhsap Pi Juhi Mukherjee IAS hovin India Republic Day vawi 64-na ropui taka lawm a ni a, Republic Day lawmna inkhawm bul tan nan Bawrhsap chuan Hnam Puanzar pawt pharhin, chibai a buk a. Republic Day Ceremonial Parade Contingent 11 te a endik hnu ah; Parade Commander S.I Lalzarliana kaihhruai Parade Contingent ten hnam puanzar chibai an buk chu Bawrhsap chuan chhang letin mipui te hnenah thuchah a sawi chhunzawm a, district mipui zawng zawngte chu Mizoram Sawrkar aiawhin Republic Day chibai a buk a ni.

District Bawrhsap Pi Juhi Mukherjee chuan, Mizo Tawnga thu sawiin India ram zalenna atana beitu te leh hruaitu hmasa te hre renga, mimal dikna zalenna leh zahawmna huumhim a nih ngei theihna tura ziak ngeia Danpui siama hmathlir thui tak an lo nei chu hriat reng a pawimawh a ni a ti a, he ni ropui tak hi remna, inunauna leh inpumkhatna tha a awm theihna tura rilru siamtharna ni a hmang turin leh mipui rorelna tha a awm theihna tura an pawimawhna te hre thar turin District chhung mipui zawng zawngte a chah a ni.

Serchhip District chhunga sawrkar hmalakna hrang hrang tarlangin sawrkar Flagship Programme-NLUP hlawhtlinna pawh a lang tan ani ti a sawiin, he programe hi sawrkar Laipui leh mith8iam tak takte pawhin an hlutin an fak hle a ni a ti a, Mizorama NLUP thawk tha ber District an ni chu chhuanawm a tih thu leh District chhunga Baktawng Tlangnuam khua in Mizoram puma NLUP kalpui tha ber khua nihna an hauh te chu ropui a tih thu a sawi bawk. NLUP 1st Phase hnuaia tanpuina pawisa pawh Line Department ten an sem zawh tep tawh thu sawiin, December ni 20, 2012 thleng khan tanpuina sum Rs. Nuaih 2524.60 lai 1st Phase hnuaia sem anih tawh thu te, 2nd Phase hnuaia tanpuina sum pawh sem thuai anih tawh dawn thu leh 3rd Phase hnuaia tanpuina dawng turte pawh thlan fel vek an nih tawh thu sawiin, 1st Phase atanga 3rd Phase thlenga beneficiaries 8246 ten an trade thlan theuh a hlawhtlinna an hmuh a beisei thu a sawi bawk.

Bawrhsap chuan Integrated Wasteland Management Programme (IWMP) hnuaia Serchhip District in Project pathum a neih te zingah IWMP Serchhip-I hnuaiah hnathawh tan tawh ani a ti a, Project dang pahnihte pawh bul tan chhoh thuai beisei a nih thu a sawi bawk. MGNREGA hnuaiah District chhung khaw hrang hranga chhungkaw 13,377 tan inhlawhna siam sak anih thu leh April, 2012 atanga December, 2012 chhunga inhlawhna ni (employment days) 64 siam anih thu a sawi bawk. Indira Awaas Yojana (IAY) hnuaiah nikum chhungin in thar 24 sak anih a ti a, hetih rual hian in hlui 19 thawm thatsak an ni bawk. National Rural Livelihood Mission (NRLM) pawh Serchhip District ah kalpui anih thuai tur thu sawiin, Serchhip Horticulture Division hnuaiah “Lunglei Zau” ah Centre of Excellence din anih thu leh he hmunah hian chhungkaw 60 zet huan/lo ram enkawlna bungraw changtlung tak nen hmalakpui an nih dawn thu a sawi.

Bawrhsap chuan Serchhip khawpui chhung kawngpui (NH-54) siam that mek anih thu sawi langin, Chhiahtlang atanga Sailiamkawn inkar chu March, 2013 ral hma a zawhfel hman ngei tum anih thu a sawi a, kawng siamthatna tura YMA leh VC te hmalakna chu ropui a tih thu sawiin a fak bawk a ni. Bawrhsap chuan “Chhiahtlang to Lamchhip” Road pawh ‘black topping” hna tan anih thuai dawn thu sawiin, hei hian Aizawl leh Serchhip inkar chu kawng awmsa aiin kilometer 30 vel a a pawh hnaih tur thu a sawi a ni. Hei bakah hian Chhingchhip MIFCO Ltd. Hmuna Milk Processing Facility for Indigenous Milk Products neih anih thuai tur thu te, Chhingchhip-a Sainik School din tura chak taka hma lak mek anih thu te, Chhiahtlang-a New Polytechnic leh Rural Self-Employment Training Institute (RSETI) din tur hma lak mek anih thu te a tarlang bawk. Kumin Republic day lawmna inkhawm ah hian mipuite mit leh beng ti tlai tur item hrang hrang bakah hnam inpumkhatna lam hawi cultural item te neih a ni a, Serchhip YMA Sub-Headquarters Cultural Troupe ten hnam lam hmuhnawm tak an entir a, 14 Assam Rifles ten Punjabi lam hmingthang Bhangra Dance an entir chuan mipui te lawm a hlawh hle bawk a ni

Parade Contingent 11 awmte zingah hian School Contingent 7 awmin a titha hengte hnenah hian Khuallian District Bawrhsap-in lawmman a sem nghal bawk : Pakhatna – Lal Thanhawla Higher Secondary School, Pahnihna – Govt. Chhiahtlang High School, Pathumna- J.M. High School, Serchhip te niin, midang zawng hnenah Participation Prize hlan an ni a, Armed Contingent pahnih Mizoram Police leh 14 Assam Rifles te bakah Unarmed Contingent pahnih Ex-Servicemen te leh NCC te hnenah pawh participation prize hi hlan an ni a, Republic Day DC Volleyball Running Trophy a lawmman pakhatna leh pahnihna sem nghal bawk niin, pakhatna Vengchung Volleyball Club hian lawmman nomawi leh tangkafai Rs. 7,000 an dawng a, pahnihna Chanmari Volleyball Club in lawmman nomawi leh tangkafai Rs. 4,000 an dawng a ni.

Republic day lawmna inkhawm neih zawh hian DC Bungalow ah chhun dar 12:30 atangin sawmbikte tan “DC’s At Home” buatsaih a ni bawk.