Right to Information Week (5^h October – 12^th October) 2015 neih mek denchhenin vawiin chawhma dar 11:00 khan Serchhip DC’s Conference Hall-ah hun pawimawh tak hman a ni a, Serchhip District Bawrhsap Dr. Lalrozama, IAS chuan khuallian niin he hun hi a hman pui.

Bawrhsap chuan kalkhawm hmaah thu sawiin Sawrkar, khawtlang huap bakah kohhran hruaitute RTI Week zara inhmuhkhawmna remchang tak a awm thei chu lawmawm a ti a, Sawrkar chu mipuite ta ani tih kan hre theuh a, kan sawi fo na chungin mipuite ta a nihna lai tak erawh sawifiah a har thin a, Sawrkar hnathawk te an in tih sawrkar viau laiin mipuite an indah pawnlawi deuh viau thin niin a hriat a, he thil chianglo tih reh a nih a mipuite Sawrkara an tel a, Sawrkar hi an ta ani ngei ani tih an hriatchian lehzual theih nan RTI Act hi duan anih thu sawiin Sawrkar hnathawkte leh mipuiten Sawrkar an hriatchian tawn a, ram tana tha ber tura thawhhona tha nen hma an lak tlan theih nan RTI Act hi hman tangkai a tul hle a ni a ti bawk. Bawrhsap chuan Sawrkar hnathawk te tan kan lo thawh rei tawh avang emaw ringawt hmachhuan a mahni hna intih hriatchian leh lutuk a, kan ngaihdan a dik ber emaw ti a midang ngaichang lek lova kal pup pup a awl thin a, mihring kaihhruai ngailo kan awm lova, that in lawm tawnin leh kalsualna laka in veng tawn turin mipuite leh Sawrkar hnathawkte kan inngaihchan tawn a kan thawhho thiam a pawimawh hle a ni a ti bawk.

RTI Week 2015 pual inkhawm hi Pu Andrew H. Lalremruata, MIS, DIPRO in kaihruaiin keynote address a pe nghal a, Pu VL Remliana, MCS, Addl. DC in RTI chungchang zirtirna pe in, zawhna leh chhanna hun benglut tak hman a ni a, mipuite leh official te hnen atanga RTI leh a kaihhnawih zawhna te chu Pu VL Remliana, Addl DC leh Pu Andrew H Lalremruata, DIPRO ten an chhang a ni.

Vawiin ‘RTI Week 2015’ puala inkhawm hi Mizoram Information Commission, I&PR Department leh Serchhip DC Office tanghovin an buatsaih a ni a, Serchhip town area a Sawrkar pisa hrang hrang SPIO, SAPIO leh DAA bakah tlawmngai pawl hrang hrang aiawh te, Village Council aiawhte, kohhran hrang hrang hruaitu te leh thuthar lakhawmtute an kalkhawm a ni.