Tukin dar 7 khan Zoram Drivers’ Union Sub-Headquarters, Serchhip bul tumin Serchhip Bazarah “Road Safety Week” (Fimkhurna Hapta) Vawi 31-na hawnna inkhawm neih a ni a, District Bawrhsap Pu P.Lalchhuanga’n khuallian niin he Fimkhurna Hapta hi a hawng a ni.

Bawrhsap chuan Zoram Drivers’ Union ten kum tin Fimkhurna hapta an huaihawt thin chu lawmawm a tih thu sawiin, a thuphung chauha fimkhurna thu sawi lova kumtluana inthlahdah hauh lova fimkhur reng a tul zia inzirtir tharna hun atana hman ni ngei se a duh thu a sawi bawk a, Driver kalkhawmte chu an mawhphurhna san zia hrilh nawn lehin an miphurhte mai bakah kawngsira mihring kalte leh motor dang te pawh venthawn vek a tulo a ni a ti a, keimahni tawka kan fimkhur bakah midangte pawh kan fimkhur kep a ngai a ni a ti bawk. Driver te hi khualzin abikin ram pawn lam atanga rawn zinte hmuh hmasak leh dawr hmasak an nih thin avangin Mizoram hmingthatna leh khualzinte tlangnelna kawngah sulsutu an ni tih sawiin miten Driver mawl an tih tur anga awm lova mahni invawn fimkhur a tul zia leh Driver hna hi hna zahawm anih zia tarlang tur chuan anmahni Driver te bawkin mawh an phur lian ber a, invawnfai kawngah te, insumtheihna kawngahte tan la lehzuala mi hawihhawm leh hawizau ni tura theihtawp chhuah turin a fuih a, Sawrkar officer te leh motor neitute pawhin an mawhphurhna an hriatchian a pawimawh thu a sawi bawk a ni.

Tukin Road safety Week hawn inkhawm hi Pu T.Rosiama, President, ZDU Sub-Headquarters, Serchhip-in a kaihruai a, Pu Lalremruata Ralte, Secretary, ZDU Sub-Headquarters, Serchhip-in Report pe in District transport Officer, Pu M.C Sangchhunga pawhin kalkhawmte fuihna thu a sawi bawk a ni.