Zoram Drivers’ Union (ZDU) huaihawtin vawiin (3rd Dec. 2013) atang hian Mizoram pumah Fimkhurna Hapta, Road Safety Week vawi 33-na chu hman tan leh a ni a, Serchhip-ah pawh he Hapta hawnna hi tukin zing dar 7:00 khan Serchhip Bazar, Taxi Stand-ah neih niin District Bawrhsap, Pi Juhi Mukherjee, IAS chuan he Hapta hi a hawng a ni.

He Hapta hawnna inkhawm ah hian District Bawrhsap, Pi Juhi Mukherjee chuan kum tina lo hman tawh thin anga Road Safety Week hi hman a nih thu sawiin, lirthei khalhtu zawng zawngte chu fimkhur lehzual turin a chah a. Krismas vuakvet chho ah hian zin veivak kan tamin, chhungkaw tin ten Krismas leh kumthar hlim taka kan hman theih nan lirthei khalhtu ten mawhphurhna lian tak an nei tih a sawi a, mite tana tahna thlentu ni lova hlimna thlentu an nih theuh theih nan an lirthei khalh ah fimkhur lehzual turin lirthei khalhtu zawng zawngte chu a chah a ni. Road Safety Week hman chhung hian Transport Department leh Police Department lam pawhin lirthei veivak chungchangah khauh lehzualin hma an la thin tih sawiin, hei hi mipui vantlang that tlanna tur a nih tih hre renga tawiawm thiam turin lirthei khalhtu zawng zawng leh mipuite a chah a, Motor accident leh kawng laka chetsualna a tlem ngei beisei chungin he Road Safety Week hi a hawng tih a sawi a ni.

Pu H. Lalhmingliana, District Transport Officer, Serchhip District pawhin thu sawiin Dan zawm hi fimkhurna pawimawh ber a nih thu a sawi a. Tunlaia Signal light kan hmang diklo nasa lutuk chu chetsualna thlentu a nih theih thu te, lirthei khalh chunga Mobile Phone hman chu Dan in a phalloh thu leh man an nih chuan an licence cancel sak thlenga hrem theih an nih thu te, Motor Horn reng reng lawmthu sawina atana hman tur a nih loh thu leh emergency atan chauha hman tur a nih thu te sawiin, zu rui chunga lirthei khalh chu chetsualna thlentu tam ber a nih thu te a sawi a, chetsualna thleng za zela 80 vel chu zu ruih vang a nih thu sawiin, lirthei khalhtute chu anmahni bakah midangte fimkhur kep turin a chah bawk.

He Hapta hawnna hun hi ZDU Sub-Hqrs. Serchhip Vice President, Pu S. Lalpianga chuan a kaihruai a, an pawl President, Pu T. Rosiama chuan inlawmna thu sawi a ni. He Hapta hi tun thla ni 9 thleng hman tur niin he Hapta hman chhung hian Serchhip Bazar leh Serchhip Sailiam Kawn-ah te ZDU hian Week Flag chu an zuar dawn a. Week Flag hi pakhat Rs. 20/- aia tlawmlo a lei sak theuh turin lirthei khalhtute chu ngenin hemi rual hian lirthei khalhtute tana hriattur chi hrang hrang inziahna lehkha chu an sem nghal zel bawk a ni.

Attachment

  • Loading attachment...