Vawiin dar 11:00 hian DC Conference Hall ah Right to Information Week 2016 hman a ni a, Bawrhsap Dr. Lalrozama, IAS chu khuallian a ni.

Khuallian chuan Right to Information Act, 2005 hi langtlang sawrkar siamna hmanraw pawimawh, ram neitu mipuiten ram kalphung engkim an hriat ve thlap thlap theihna atana hmanraw tangkai ber te zing a mi a ni a, dan zahawm leh hlu tak a ni. Amaherawh chu sawrkar hnathawk ten RTI hmanga zawh chhuah ngai hauh lo tur thil tam tak kan la pho chhuak tawk lovin kan la inhawng zau tawk lo deuh niin a lang thin a, hei hian tul lovah RTI hmanga zawhna a awmtir tam phah deuh a ang, vawiin atang hian RTI Act in min phut Public Authority te tih ngei tur thilte kha i ngai pawimawh thar teh ang u, a ti. RTI chu vawi tam tak kan lo zir tawh a ni thei a, mahse ram kalphung leh hnathawh dan te a inthlak chhoh ve zel avangin RTI Act leh a taka hman dan tur atan kan intuaithar ve zel a ngai a ni tiin kalkhawmte a chah bawk.

Vawiina RTI Week 2016 hmanna ah hian Pu Lalremruata Sailo, MCS, ASO Serchhip chuan RTI dan hnuaia SAPIO, SPIO leh DAA te mawhphurhna sawiin zirtirna a pe a, Pu Vabeimozachhi Chozah, MCS, SDC chuan RTI hmanga zawhna zawt tute hriat tur leh tih tur zirtirna a pe thung. Heng mithiam ten zirtirna an pek zawh hian kalkhawm te atangin hriat duh leh zawhna awmte ngaih thlaka sawiho a ni a, RTI Act hmanga zawhna harsa deuh chinfel dan a taka lo tawng tawh SPIO ten kalkhawmte hmaah an chinfel dan an sawi hlawm bawk.

Inkhawm kaihruaitu Pu K. Saitluanga, MIS, DIPRO Serchhip chuan, RTI Act India ramin a lo hman tan dan leh vawiin thlenga tangkai taka khua leh tui ten an hman thin dan a sawi lang a, he dan hi sawrkar hnathawktute tana a that dan te, a hmang tangkaitu khua leh tuite tan a hlut ziate, mipuite rawngbawlna atana dan pawimawh ber te zinga mi a nih thute a sawi lang bawk.

Vawiina RTI Week hmannaah hian Serchhip a SAPIO, SPIO leh DAA te bakah tlawmngaipawl hrang hrang aiawhte, Village Council zawng zawng aiawhte, Chanchinbumite leh RTI Act chungchang hre duh mi engemawzat an tel a ni.