2517/2026-2027

Dated Serchhip, the 6^th October, 2025: Vawiin khan Serchhip Deputy Commissioner Office leh District Information & Public Relations Office te huaihawtin 'RTI Week Hawnna inkhawm' Serchhip Pisapui Hall-ah buatsaih a ni a. Deputy Commissioner Pu Paul L. Khuma chu Khuallian niin Additional Deputy Commissioner Pi Dorothy Muansangin hun a kaihruai a ni.

District Bawrhsap Pu Paul L. Khuma chuan sawrkar hnathawkte chu langtlang leh rintlak, sawrkar siam tura mawhphurtu, mipuite'n rinna an nghah ngam an nih a tul thu a sawi a. "Rawngbawl saka awm tur kan ni lo va, mipuite rawngbawl saktu zawk kan ni" tih hre thar leh theuh turin a fuih.

Vawiin hun hmannaah hian Assistant District Rural Development Officer leh RTI Master Trainer ni bawk Pu Stephen Laltlansanga Auhmun chuan RTI chungchanga hriat tur pawimawh chi hrang hrangte a sawi a; RTI zawhna chu Plain Paper hmangin awlsam taka zawh mai theih a nih thu te, sawrkar hmalakna leh file-a note ziah dan te, hnathawhna hmun endikna (Inspection) thlengin dil theih vek a nih thu sawiin, RTI chu sawrkar lang tlang neihna tur leh mipuite thuam chakna hmanraw pawimawh tak a nih thu a sawi bawk.

Zawhna leh chhanna hun hlawkthlak tak hman zui a nih hnuin Serchhip District Information & Public Relations Officer Pu R. Vanneihtluanga'n lawmthu sawiin hun hi a khar a ni.

Vawiin hun hmanna-ah hian Office hrang hranga hotute, Department hrang hranga hnathawkte, MJA te, khawtlang hruaitu VC leh YMA te, MUP leh MHIP te bakah RTI Activist te an kalkhawm a ni.