2518/2026-2027

Kolasib, 6th October, 2026: Vawiin khan I&PR Conference Hall, Kolasib-ah Right to Information (RTI) Week, 2026 pualin hun hman a ni. He hun hi Kolasib Addl. DC, Pi B. Malsawmtluangi chuan a kaihruai a, Kolasib Bawrhsap Pu H. Dolianbuaia chu khuallian a ni.

Khuallian Pu H. Dolianbuaia chuan thu sawiin, RTI chu sorkar inrelbawlna tha zawk neih nan leh thatchhiatna te, eirukna te leh thil tha lo hrang hrang a ven theih avanga ram inrelbawlna atana dan pawimawh tak a nih thu a sawi a. State Information Commission-a Secretary hna a lo thawh tawh thin thu sawiin, RTI hmangin thil thukrukte leh dik lo tam tak phawrh chhuah a lo nih tawh thu a sawi a. SPIO leh SAPIO te chu an mawhphurhna hrechiang tur leh mipuite atanga zawhna an dawn ang angte chu dawt tel lo, dik leh langtlang taka chhang thin turin a chah a. Mi tu emaw huat vang ngawta chhanna dik lo leh langtlang lo pe lo turin a chah bawk a ni.

Bawrhsap chuan RTI chu mipuiten sorkar department hotu leh staff-te an endikna leh enfiahna hmanrua a nih rualin, tangkai leh thiam taka hman a ngai a ni, a ti a. "Sorkar hnathawkte pawhin RTI hmanga zawhna kan dawnte hi mipuiten min tihbuai tumnaah ngai lovin, min thawhpui an tumnaah ngai zawk ila, tha takin dawngsawng zel thin ang u. RTI hi thiam taka hman a nih chuan sorkar hnathawh a sawt zawk ang a, ram pawhin hma a sawn ngei ang," a ti. Sorkar laipuiin RTI dan a zam chu ngai thutak theuh turin kalkhawmte a fuih bawk.

He hunah hian Pu Isaac Malsawmtluanga, SDC, Kolasib chuan PowerPoint Presentation hmangin RTI thiltum, a hman theih dan leh RTI Act hnuaia thil pawimawh hrang hrangte sawifiahna hun a hmang a. Sawm bik (Invitee) atanga thu sawitu, Pu C. Zomuanpuia, President, MJA Kolasib pawhin thu sawiin, "Mi tihsual zawn nan ngawt RTI hi kan hmang tur a ni lo a. RTI chu mipui leh sorkar khalj ngiltu leh sorkar hnathawkte tana darthlalang pawimawh tak a ni," a ti bawk.

Vawiina RTI Week hmannaah hian Kolasib khawpui huam chhunga sorkar department hotute, tlawmngai pawl hruaitute, MJA Kolasib member-te leh Joint VC aiawhte an tel tha hle a ni.