2519/2026-2027

Dated Aizawl, the 6th October, 2026: Tukin zing khan Environment, Forests & Climate Change Department Minister, Pu Lalthansanga chuan National WildLife Week vawi 72-na denchhenin Aizawl Zoological Park-a Class IX leh X zirlai naupang Educational Field Trip nei turte chu Vanapa Hall kawt atangin a vailiam a, "A guide to Aizawl Zoological Park” Handout chu a tlangzarh nghal a ni.

Minister chuan educational field trip a nih ang ngeiin zirlaite chu nungcha leh ramngaw humhalh pawimawhna zirchhuah tum turin a chah a. Mizorama kan nungcha tam tak chu ram danga hmuh tur vang tak tak, dan hnuaiah pawh humhalh nasat bikte zinga mi an nih thu sawiin thangthar zawkte chu nungcha leh an chenna ramngaw humhalh kawnga midangte tihhmuhtu ni turin a chah a. Hriatthiam loh leh hriat duh an nei a nih chuan zawhna zawh hreh lo tura zirlaite chu chahin midangte zirtir chhawng thei tur khawpa hriatna zu chherchhuah tum turin a chah bawk.

Minister chuan zirlaite chu ramsa humhalh tura intiamtirin he field trip hian ramngaw leh nungchate hmangaih tharna an thinlungah a tuh ngei a beisei thu a sawi a ni.

Flag-off programe-ah hian Pu MZ Singson, Chief Wildlife Warden, Mizoram chuan official kalkhawmte leh zirlai naupangte lawmna thu a sawi a. 72nd National Wildlife Week chhung hian MoEFCC, Govt of India duh dan angin ceremonial indoor function aiin field visit leh outdoor activities lam uar a nih tur thu a sawi bawk.

Pu Lalbiakchama Chawngthu, Director, Aizawl Zoo chuan Students' Educational Tour buatsaih a nih chhan leh hriattur pawimawh dangte sawiin he programme atang hian zirlaiten nungcha humhalh kawnga hmasawnna an neih ngei an beisei thu a sawi a ni.

National Wildlife Week hi kum tin October ni 2 atanga ni 8 chhungin India ram pumah hman thin a ni a. Kumin National Wildlife Week thupui (theme) atan hian “Connecting habitats, thriving wildlife” tih chu India ram pumah hman a ni. National Wildlife Week chhung hian India ram pumah nungcha leh an chenna ramngaw humhalh kawnga inzirtirna beihpui thlak a ni a, Mizoramah pawh state pum huapin nungcha leh ramngaw humhalh chungchanga inzirtirna programme chi hrang hrang EF&CC Department chuan a kalpui mek a ni.

Educational Field Trip hi tum thum neih tur niin vawiin hian Synod HSS leh Govt. JL HS zirlai naupangte'n an nei ang a, October ni 7 hian Govt. Mamawii HSS leh Govt. Republic HSS te'n neiin October ni 8 hian Govt. Mizo High School leh Govt. Chaltlang High School-te'n an nei bawk ang. School tin atang hian zirlai 25 leh zirtirtu pahnih theuh an kal dawn a ni.