Serchhip District chhunga NABARD kaltlanga Soil & Water Conservation Department hnuaia Rubber ching tura thlan te tan vawiin chawhma dar 11:00 khan Serchhip Hmar Veng YMA Hall-ah Rubber chin dan chungchang zirhona neih a ni a, he hun hi Serchhip District Addl. DC, Pu Lalsangliana chuan a hmanpui a ni.

Pu Lalsangliana chuan Training a thil zir chu thiamna leh inrintawkna min petu anih thu sawiin ngaih pawimawh hram hram a tul thu a sawi a, kan thawh hahpui leh rim taka kan thawhrimna avanga hlawhtlinna kan hmuh te chu a lawmawm bik tih sawiin, thawhrimna leh beih hram hramna tel lova hlawkna hmuh kan tum thin avangin hlawhtlinna aiin hlawhchhamna kan dawng zawk tih a sawi. Thawhrimna leh hahpuina tel lova hlawkna hmuh kan tum thin avang hian kan rilru put hmang pawh a dik tawhlo, a ti a, thangthar te zingah kuthnathawh ngainep thin an awm chu pawi a tih thu pawh sawiin, mi hlawhtling kan tih te hi rim taka hna thawk thin leh hrehawm tam tak tuar tawh an ni tih kan hriat reng a pawimawh thu a sawi bawk. Hlawhtlinna chu a suala sualchhuah a ngai a ni, a ti a, he huna kalkhawmte pawh hlawhtlinna an hmuh theihna tura theihtawp chhuaha hna thawk tur leh tanpuina an hmuh te pawh a nihna tur ang taka hmang turin a chah bawk.

Mizoram-ah hian Kolasib, Mamit, Lunglei, Lawngtlai leh Saiha District-ah te Rubber hi chin theih tura ngaih a ni a, hemi bawhzuina atan hian Soil & Water Conservation Department hian Serchhip District chhungah National Bank for Agriculture and Rural Development (NABARD) hnuaiah hian Rubber ching turin hma an la mek a, he Project atan hian cheng nuai 58.44 ruahman niin kum 4 chhunga kalpui a ni dawn a, tunah hian ram Hectare 80-ah mi 80 te chu Rubber ching tur hian thlan an ni tawh a, heng mi ten Rubber an chin tur tharchhuak turin Mat Phai-ah Rubber Nursery siamin tunah hian helai hmunah hian Rubber tiak 73,700 a awm a, he Nursery-a Rubber kuitiah tur a chi te chu NABARD hian an rawn pe a ni.

Vawiin a Rubber chin dan chungchang zirhona hun hi Pu HL. Chungnunga, District Soil Conservation Officer chuan a kaihruai a, Pi Rosy Lalmuansangi Hmar, Asst. Soil Conservation Officer chuan he huna kalkhawmte chu Rubber chin dan chungchang a lem nen a entir a ni.

He training ah hian Rubber ching tura thlan mi 80 atangin mi 54 an tel a ni.