Vawiin chawhma dar 10:30 khan DC Conference Hall Serchhip ah Planning & Programme Implementation Department, Govt. of Mizoram bul tumin Sensitization Workshop on Sustainable Development Goals for Line Department neih a ni a. Dr. Lalzirmawia Chhangte, District Bawrhsap chuan he hun hi a hmanpui.

Bawrhsap chuan thusawiin, Sustainable Development Goals hi hmasawnna kawng kan zawh meka min kaihruaitu atan a tul hle a, hmasawna tluantling leh tlo nei tura kawng pawimawh tak a ni, a ti. Ram thanglai leh hnufual zawkte tan hian hmasawnna hna thawh hi a pawimawh em em a, chumi atan chuan sawrkar pawhin ruahmanna a siam nasa hle a ni. Amaherawhchu hmasawnna hna kan thawhna avanga thil dang, nghawng thalo a thlen thei em tih erawh kan ven thiam a tul hle a ni, tiin, hmasawnna hna kan thawh te chu kan chhawm nun reng theih tur, tlo leh ngelnghet a ni tur a ni, a ti bawk.

He hun kaihruaitu Pu Lalchhuanawma Hrahsel, Chief Consultant, SDG Mizoram chuan Sustainable Development Goals tobul a sawi a, kan chenna khawvel hi hi tun aia tha zawka siam anih theih nan UNO in kum 2015 a din niin, 2030 thlenga kalpui tura ruahman a nih thu a sawi a. Khawvel pumah hma lak niin, tum pawimawh tak tak 17 a nei a, chungte chuan target nei leh vekin, avaiin target 169 a awm thu a sawi. SDG hi sawrkarin amah maia a tih hlawhtlin theih a ni lova, State level atanga thingtlang ber thlenga tanrualna atanga hlawhtling thei chauh tur anih thu sawiin, vawiin ah pawh hian district chhunga an thawhpui tur sawrkar department hrang hrangte hnenah an hnathawh dan tur leh kalphung turte inhrilhhriatna hun buatsaih a nih thu a sawi a ni.

He hunah hian Pu C. Lalnunmawia, Consultant, SDG chuan Concept and overview of SDG in Mizoram and localization of SDGs tih thupui chu a lem nena entirin a sawi a. Pu C. Vanlalzawna, Consultant, SDG pawhin SDGs Indicator: National, State Indicator and District Indicators & Way Forward tih thupuia hmangin a lem nen entirin a sawi bawk a ni.

Sustainable Development Goals (SDG) hian sawrkar department, a thawhpui leh behchhan tur 25 a nei a, chung zinga Serchhip district chhunga awm department hotu leh aiawhte he hunah hian an tel tha hle a ni.