Agriculture Department buatsaihin Agriculture Conference Hall, Aizawl-ah vawiin khan Soil Health Card Day puala hun hman a ni.

Agriculture (Crop Husbandry) Director Pu Rohmingthanga Colney loneituten thlai mamawh ang zela lei tihthatna (fertilizer) an hman thiam theih nana kaihhruai chu he Soil Health Card scheme-in a tum lian tak a nih thu a sawi a. He scheme hmang hian loneitute buh leh thlai chinna rama lei (soil) te lak thin a ni a, chu chu mithiam ten a endikna hmun bik, laboratory-a an endik hnuah an thil hmuh leh an thlai chinin a mamawh tur fertilizer te ziah lanna Card chu loneitute hnenah an pechhuak thin a ni, a ti. Agriculture Director chuan he Scheme atang hian khaw pakhat tana an lei that dan dinhmun chhinchhiahna map (village fertility map) siam tum a ni a, loneitute tan thil tangkai tak a nih ngei a beisei thu a sawi. Laboratory-a lei endik (test) hi uluk taka tih ngai a nih avangin hun pawh a duh rei deuh thin tih lo hre lawk turin lo neitute a chah a, lei hrisel takah thlai tam zawk an thar chhuah theih nan Soil Health Card-in a hrilh anga an huan leh lo te enkawl turin a fuih. Pu Rohmingthanga Colney chuan Agriculture Department-a lei endik tur la khawm thin tute leh laboratory-a lo endik thin tute pawh fimkhur leh dik taka thil ti thin tur te, lei endikna result dik leh rintlak chauh pechhuak thin turin a chah bawk.

Soil Health Card Ni puala hun hman kaihruaitu, Pi Zothansangi Sailo, Agriculture Joint Director chuan, “India ram pumah Soil Health Card vaibelchhe 14 semchhuah tum a ni a. He Scheme hi Mizoram-ah pawh kum 2015 atang khan hman a ni a, lei endik tawh atangin Soil Health Card 28,699 zet loneitute hnenah semchhuah a ni tawh a, loneitu tam takin an hmang tangkai mek a ni” a ti. Loneituten fertilizer an hmuh leh neih remchan ang ang an thlai chinte an pe ringawt thin te chu sum leh tha sen thlawnna mai a ni thei thin a, hengte hi tihbo a nih theih nan Soil Health Card-ah chuan fertilizer hman tur bik leh hman zat turte ziah lan a ni a, hei hi loneituten an tangkaipui hle turah ngaih a ni, a ti bawk.

Sawrkar laipui chuan loneitute hman tangkai theih turin February ni 19, 2015 khan Soil Health Card Scheme chu a lo hawng tawh a. Kum 2020 atang hian February ni 19 hi Soil Health Card Day atan a puang a ni. India rama a hmanna pui ber chu PUSA, New Delhi-ah neih a ni a. ICAR, Umiam, Meghalaya-ah India Hmarchhak State te tan Workshop buatsaih a ni bawk.

Soil Health Card Ni puala hun hmanah hian Agriculture Department-a thawk Officer leh staff te bakah loneitu sawm bik te leh chanchinbumi eng emaw zat an tel a ni.