Sericulture Minister Dr. B.D.Chakma chuan vawiin chawhma khan Serchhip District Sericulture Office tlawhin Sericulture Department hnuaia NLUP 2nd Phase beneficiary 54 hnenah tanpuina sum final installment a sem.

Serchhip Kikawn Veng a Sericulture Department Office a NLUP beneficiary kalkhawmte hma ah Dr. B.D.Chakma chuan Pangang vulh chu taimak ngai tak leh a enkawltuten an mawhphurhna an hlen that leh that loh a a hlawhtlinna innghat nasa tak anih thu a sawi a, pangang khawi chu scientific deuh anih avangin khirh takin lang mahse a vulhtu te an tui phawt chuan eizawnna hahdam leh nuam tak ani a ti a, a hralhna tur market awm sa leh a rate bithliah lawk sa vek anih avangin a hlawkna tel tur zat pawh chhutchhuah lawk theih vek a ni a, a tuichilh mi tan chuan hlawhtlinna bak hmuaktu a awm loh thu a sawi a ni.

Minister hian NLUP 3rd leh 4th Phase beneficiary te tan pawh an pawisa dawn tur a awm sa vek tawh a, “One Village, One Crop” anga kalpui tum anih tawh avangin hma thar lak a ni a, peihfel tep anih tawh thu a sawi bawk.

District Sericulture Office, Serchhip hnuaiah hian NLUP 2nd Phase beneficiary 123 an awm a, Officialte leh VLNC ten joint verification an neih fel tawh hnu a NLUP pek chhunzawm tura an tih Chhiahtlang leh Khawlailunga beneficiary 54 te hnenah vawiin hian NLUP final Installment Rs. 18,024/- theuh pek niin an zinga 5 te hi sumfaia pek an ni a, a bak zawng chu an bank account ah dah sak an ni. 2nd Phase beneficiary la pek loh te pawh joint verification neih zawh veleh pek chhunzawm nghal zel an nih tur thu Pu V.Zothansanga DSO in a sawi a ni.

District Sericulture Office, Serchhip hnuaiah hian NLUP beneficiary 211 an awm a, 1st Phase ah beneficiary 65 awmin tanpuina sum an dawn tur te pek kim vek tawh an ni a, 3rd Phase ah 19 leh 4th Phase ah 4 an awm bawk a ni.

Minister hi Pu Lalrinmawia, Director, Sericulture Department in a tawiawm a ni.