National Health Mission bul tumin ni hnih awh tur State Level Workshop for Member of ASHA Mentoring Group and State Mentoring Group on Community Monitoring for Community Action chu vawiin chawhma dar 10:30 khan Health Directorate Conference Hall-ah tan a ni.

He Workshop-ah hian hriselna kawnga mipuite hriatna tihpun bakah khaw hawi tihzauh nana hmalak dan tur te, hriselna kawnga thawktu, mipui ngheng hnaitu ber ASHA, Village Health Sanitation & Nutrition Committee (VHSNCS) kan tih te leh Rogi Kalyan Samity (RKS) te mipui hrisel nana hna an thawhna kawngah rem hre zawk leh huamzau zawka ke an pen theih nana thuam chak dan turte sawi ho a ni.

He workshop-ah hian Dr.Nitin Jadhav Sathi, Pune leh Seema Upadhyay, Programme Manager AGCA Secretariat, Advisory Group on Community Action te hnen atangin zirtirna ngaihthlak a ni a. Anni bakah hian thlan bikte atangin ASHA chungchang te, Village Health Sanitation & Nutrition Committee (VHSNCS) te bakah Rogi Kalyan Samity (RKS) chungchang ngaihthlak a ni a. Zawhna leh chhanna hun hman ho a ni bawk.

He workshop-ah hian heng hriselna kawnga thawktute hnen atanga chak lehzuala khawtlang mipuiten hriselna kawnga an mamawh leh chanvo te dawnga, tangkai taka an chhawr theih dan turte sawi ho a ni a. Kalphungte duang tha in hmalak tawhna leh hmachhawp hrang hrangte thlir leh sawiho a ni. He hun hi Dr.T.Lalhmangaihi, Joint Mission Director NHM in a kaihruai a. Dr.Zarzoliana, Joint Director, Malaria hnen atangin kalkhawmte lawmna leh fuihna thu ngaihthlak a ni bawk.

He workshop-ah hian Social Welfare Department, Mizoram University bakah NGO atangin YMA, MHIP leh Open Door atangin sawm bikte an kal tha hle a. Health Department atangin Programme Officer hrang hrangte an tel kim hle. Workshop hi naktuk chawhma dar 10:00-ah Action plan hrang hrangte duang tura neih chhunzawm leh tura ruahman a ni.

ASHA leh Village Health Sanitation & Nutrition Committee (VHSNCS) te hi Village Council tin huam chhungah din fel an ni tawh a. Rogi Kalyan Samity pawh hi PHC, CHC, District Hospital tinah leh Falkawn Referral Hospital-ah te tluang taka kalpui mek a ni.