Kum danga June thla a neih thin “Sikserh Do Beihpui” chu kuminah chuan April thla hian neih a ni mek a, hemi hun chhung hian kawng hrang hrangin Sikserh Do beihpui thlak mek a ni. He Beihpui hun pawimawh tak hi 8th April, 2010  zan dar 6:30 khan Chief Medical Officer, Conference Hall, Serchhip ah Dr. C. Lalthanmawia, State Programme Officer (Malaria), Directorate of Health Services, Mizoram chuan a hawng a ; Sikserh chungchang mipui zirtirna hla “Sikserh Ralpui” Music video, Durtlang Branch YMA siam chu a tlangzarh nghal a ni. SPO chuan kum 2009 khan Mizoram ah sikserh vangin mi 119 an thi a, chung zinga a tam ber chu an nat viau tawh hnua damdawiin panpui, daktawr te pawhin an chhan hman loh te an ni tih a sawi a ; Sikserh vanga thihna pumpelh tur chuan khawsik reng reng chu a chhan dang hriat a nih loh phawt chuan mahni hnaih ber FTD/ASHA hnenah thisen ekzam tir a sikserh damdawi ei nghal zel a pawimawh ber ani a ti.
He hunah hian Serchhip Sub-Headquarters YMA Branch 27 zaipawlte Sikserh dona hla - “Sikserh Ralpui” leh TB dona hla  - “TB Doral lian” - sa a intihsiak final round a top 5 te inelna pawh neih nghal niin pakhatna Serchhip Field Veng Branch chuan Rs. 5,000/- (Cheng sangnga) an dawng a, pahnihna IOC Veng Branch in Rs. 4,000/- (Cheng sangli) dawngin pathumna Hmar Veng Branch in Rs. 3,000/- (Cheng sangthum) an dawng a ; YMA Branch dang ten Rs. 2,000/- an dawng theuh bawk. Lawmman sumfai bakah hian he intihsiaka tel YMA Branch zawng zawngin steel thingpuino dawrzawn 5 theuh an dawng bawk a ni. Hetiang YMA  zaipawl inelna hi Tuichangral South Group leh Tawitlang Group YMA conference-ah pawh an lo nei tawh a ; April thla tawpah hian Vantawng Group YMA Conference-ah pawh neih tum a ni. He intihsiak hi Serchhip District Vector Borne Diseases Control Society buatsaih a ni.