Vawiin khan Mizoram University Festival 2010 kharna  MZU  Conference Hall-ah neih a ni a, Mizoram Governor Lt. Gen. (Rtd), M.M.Lakhera, PVSM, AVSM,VSM chuan khuallian niin a hmanpui.

 

 

 

 

Governor chuan Zirlaite chu an zirnaah thahnemngai leh zual turin a fuih a, thawhrimna tello chuan hringnunah hian engmah a hlawhtlinpui theih loh a ni a ti. Zirlaite chuan enge an duh tih hi an rilruah an hrechiang tur a ni a, rilru leh thinlung taka kan thawh phawt chuan hlawhtlinna hian tupawh hi a hmuak vek a ni a ti a. Zirlaite chu Mizoram University ah India rama zirtirtu tha ber ber te an neih avangin an vanneihzia inhria a, he an vanneihna hi a tak rama chantir ngei turin a fuih bawk a ni.
            
Mizoram University Festival hi a vawikhatna niin April ni 5 (Thawhtanni) khan tan a ni a, he Festival ah hian Mizoram University hnuaia zirlaite chu  House 4-ah inthenin intihsiakna hrang hrang sawm leh pakhatah inelna neih a ni a,  he intihsiaknaa lawmmante hi khuallianin a sem nghal a ni. Tun dinhmunah Mizoram University ah hian Department hrang hrang 28 awmin zirlai 850 vel an awm mek a ni.