Vawiin chhun khan Serchhip DC Conference Hall-ah Langtlang sawrkar (Transparent Government) nei tura sawrkar hmalakna kal zel zinga pakhat, mipuite lungawilohna rang taka thawidamna (Public Grievance Redressal System) atana hmanraw pawimawh tak Centralised Public Grievance Redressal and Monitoring System (CPGRAMS) chungchanga inzirtirna neih a ni a, Training hi District Bawrhsap Pu P.Lalchhuanga’n hawngin Serchhip a sawrkar pisa hrang hrang hotute an tel tha hle a ni.

District Bawrhsap chuan CPGRAMS chu mipuiten sawrkar laka lungawilohna an neih te rang taka thawi dam anih theih nan leh thudik hmanga chhanna pek an nih theihna atana Mizoram sawrkar hmalakna pawimawh tak a ni a ti a, he kalphung thar hi February thla laihawl vel atanga hman tura ruahman anih avanga lo inhmakhawsuih lawk chu a tul ani tih sawiin training tura kalkhawmte chu uluk taka rilru pe chunga an thil zirte hrechiang turin a chah a, sawrkarin a ngaihpawimawh ber chu Transparency (langtlang) leh Delivery System tha hi a ni tih sawiin hei hi Department tin ten an hna theuh uluk zawk leh fimkhur zawka an thawhna kawnga puitu ni se a duh thu a sawi bawk.

Serchhip District Informatics Officer Pu Lalruatmawia Zadeng -in CPGRAMS chungchang hi powerpoint hmangin zirtirna a pe a, System offline demonstration nei nghalin, hriatthiam loh zawhna awm ang ang te a sawifiah nghal zel bawk a ni.

CPGRAMS hi internet kaltlanga mipuiten sawrkar laka an lungawilohna leh an hriatfiah duh an zawh theihna tur atana duan a ni a, computer thiamlo tan pawh an thil zawh duh te chu sawrkar pisa ah kalin thawn sak turin an ngen thei dawn a, file kal dan zawng zawng hmuh theih veka a awm dawn avangin Complain siamtu chuan a thu zawhin a thlen chin leh sawrkarin hma a lak zui dan te internet kaltlangin a vil reng thei dawn a ni.