Vawiin chawhnu dar 1.30 khan UD&PA Minister Pu Zodintluanga hovin a pisaah Urban Development & Poverty Allevaiation (UD&PA) Department hnuaia Aizawl khawpui chhung leh a chhehvel a kawngpui thar sial dan tur leh a awmsa te tihzauh leh thawmthat dan tur chungchang sawiho a ni a. He meeting-ah hian Parliamentary Secretary PWD Pu Lal Thanzara te, Pu Lalram Thanga, Secretary to Chief Minister te, Pu R.L. Rinawma, Principal Secretary, UD&PA te bakah PWD leh UD&PA Department hotute an tel a ni.

Central sawrkar-a Ministry of Urban Development & Poverty Alleviation chuan 3.1.2012 a meeting an neih vawi 103-naah JNNURM hnuaia Aizawl khawpui chhung leh a chhehvela kawngpui siamna turin project pathum a pawmpui a. He project-te hi – Aizawl City Phase I, cheng nuai 3873.40 senna tur te; Vaivakawn – Mizoram Univerisity inkar kawng tihzauh leh siamthatna tur cheng nuai 1907.64 te leh Sihhmui – Mizoram University inkara Aizawl City Ring Road sialna tur cheng nuai 5309.32, a vaiin cheng nuai 11090.36 a ni.

He meeting-ah hian Aizawl City Ring Road sialna tur survey neih mek chu ni 10 chhunga zawhfel hman tura ruahman a ni a. Kawngpui chei that hnate pawh tun thal chhunga thawk hman ngei tura a tul anga bawhzui tura rel a ni.