Vawiin chawhnu dar 1 khan Serchhip DC Office chamber-ah District Bawrhsap Pu P. Lalchhuanga hova sawmbikte thukhawm chuan Hunpui lo thleng tur hlimawm tak leh muanawm taka hman a nih theih na tura Sawrkarin mipuite hnena thupek a chhuahte zawm that anih lehzual theih nan “Talk Show” neih an rel.

District Bawrhsap chuan Talk Show buatsaih tul a tih chhan sawiin dan leh thupek zawm hi mipuiten kan mawhphurhna ani tih kan hriat chian a pawimawh avang leh Sawrkarin mipuite rawng a bawl sakna kawngah Sawrkar leh mipui inkarah “communication gap” a awm chuan thawhhona tha a awm dawn lo va, mipuite chu a tuar tu bawk an nih thin avangin inlaichinna tha a awm a pawimawh a, a bik takin Hunpui lo thleng turah hian mipuite leh sawrkar tanrual that a pawimawh em avangin mipuiten dan leh thupek kengkawh tu te an tawiawm that theih nan leh dan an zawm that theih nan te, faina chungchanga hma sawn leh zual anih theih nan te “sawihona hun ‘ (Talk Show) hi buatsaih tum ani a ti a, a remchan dan azirin sawrkar hmalakna chi hrang hrang chungchangah hetianga mipuite tel ve theihna tur programme hi buatsaih chhunzawm zel a tum thu a sawi bawk.

Vawiin meeting thuchhuak ah chuan December ni 9, 2011 (zirtawp zan) ah Serchhip Hmar Veng YMA Hall-ah “Talk Show” hi neih tur a ni a, local cable TV ah live telecast tura ruahman niin hetah hian District Bawrhsap hovin dan kenkawh chungchang leh faina chungchanga hmala tu Department hrang hrang hotuten Hunpui lo thleng tur hlimawm leh muanawm taka hman anih theih nan a sawrkar ruahmanna leh hmalakna te an sawi fiah ang a, ngaithlatu mipuite atangin zawhna an chhang bawk ang, hei bakah hian in lam atanga thlirtuten sawihona a an tel ve theih nan “live phone-in” hun siam a ni bawk ang.

He talk show ah hian District chhunga Sawrkar pisa hrang hrang hotute pawh telin Talk Show topic kaihnawih thil zawhna te an Department chhan tur a awm chuan an chhang dawn bawk a ni. He show hi mipuite tan liau liau a ni a, politics a inchirhthehna ang chi zawhnate chu pawm anih loh tur thu sawi a ni bawk.