Vawiin khan Social Welfare Minister Pu PC Lalthanliana’n Mualpui ah Muanna In Dormitory thar a hawng.

Minister chuan khawvel ngaiha miropui leh milian te enhrang lo tu Pathian ngaiah chuan Muanna In-a khawsa te chu a ropui ber te zinga mi an ni tiin Salvation Army te chu khawpui pawn leh daiah te kala rawngbawltu, Krista zirtirna keng nungtu pawl an ni, a ti. Muanna In-a naupang khawsa te chu nu leh pa kara seilian tam tak te aia zirtirna leh kaihhruaina tha dawng tu an nihzia hrilhin mahni inrintawkna nei tlat turin Minister chuan a fuih a. Mizorama tlawmngai pawl te leh khawtlang tana thawk tu pawl hrang hrang te fakawm a tihzia pawh sawilangin sorkar hmalakna ringawt chu a tawk loh thu leh Social Workers hrang hrang te chu Mizoram damna tura pasaltha te an ni, Social Welfare Minister chuan a ti bawk.

Dormitory sakna tur hian Social Welfare Minister chuan November 2010 khan cheng nuai 15 a pe a, 2011 July thla atang khan sa tanin November thla hian zawhfel a ni ta a ni. Hawnna inkhawm hi Lt. Col. Lalramhluna C.S. chuan a kaihruai.