Chawlhkar khat awh tur State Level PMEGP Exhibition chu vawiin chhun khan Assembly Annexe Building hnuai berah Environment & Forest Minister Pu H. Rohluna’n a hawng a, MLA Pu R. Selthuama leh Col.Z.S Zuala te pawh an tel.

Tualtah puan, mau leh hrui-hnang hmanga thilsiam, aluminium leh motor ke chhia leh mombati bakah eitur chi hrang hrang pholanna pindan 31 lai hawngin Minister chuan sorkarin hmasawnna tura ruahmanna hrang hrang a siam te hi dik tak leh taima taka hman chuan hlawhtlinna leh eizawnna tluantling min thlentir thei tu an nih laiin hemi atana sum hman puk tur te chu dik taka rulha hman tangkai a pawimawh a ni, a ti. Sum lak puk chi reng reng a rulh leh lam ngaihsak loh chuan midangte tan kawng ping tu anih dan te tarlangin Minister chuan thilsiamna tenau leh lian tham bun tum ten hei hi hrereng fo se a duh thu a sawi a ni. Mizoram hausakna ber pakhat mau hlutna belhchhah tur leh hlawk zawka Mizoramin mau atanga sum a hmuh theih nana ruahmanna thar an kalpui mek chungchang sawiin E&F Minister chuan Mizoram mau te chu a puma thawnchhuak tawh lovin sawngbawlsa leh phel darh sa a thawnchhuah chu enchhin mek a ni, a ti a. Mahal leh Permit hmanga Mizoram mau tam tham tak thawnchhuah thin te chu titawpin tunah hian kawng thar dap mek a ni, a ti bawk.

Exhibition hawnna hun kaihruaitu KVI Board Chairman Pu K. Lianzuala, MLA chuan inlawmna thu sawiin KVI Board hnuaia PMEGP kalpui dan tlangpui a tarlang.

Mizoram KVI Board hian REGP/ PMEGP Unit te tan Exhibition chi hrang hrang a buatsaih thin a. 2011-12 chhung hian Mamit, N.Vanlaiphai, Champhai leh Kolasib ah te District Level Exhibition a lo nei tawh a ni. He Exhibition-ah hian PMEGP Unit ten an thil siam chi hrang hrang an phochhuak a. December ni 2-10 chhung hian zing dar 10 atanga tlai dar 4 thleng a duh apiang tan dawr theih an ni.