Nakum 2012, February thla- a North East Games Aizawl-in a thlen tur chungchangah, Organising Committee chu Chairman & Chief Minister Pu Lal Thanhawla hovin vawiin khan Chief Minister Office’s Conference Room-ah meeting pawimawh tak an nei.

Meeting-ah thuhma tawi a sawi ah, Chief Minister chuan sorkarin sum a neih loh avangin Games buaitute inpekna a pawimawh hle dawn a ni a ti a. An hna pangngai thawh hun piah lam thlenga thawh a ngaih tur thu a sawi a. Neitu rilru pua thahnem ngai taka thawk tlang turin Organising Committee member-te chu a sawm a ni.

Meeting-ah hian sub committee peng hrang hrangin sum an mamawhzat tur awma an hriatte tarlangin, avaiin Rs.3,98,55,150.00 sen ngai tura ruahman a ni a. Heng senso tur ruahmanna te hi la endik leh tura tih a ni a, a hmawr bawk theih hunah dilna thehluh a ni ang. Sports Authority of India in sum senso tur a rawn ruahman chu Rs.55,90,000.00 a ni a. Heta tang hian Mizoram sorkar hnenah opening leh closing function atan te leh tul dang atan direct in Rs.14,90,000.00 a ruahman bawk thu tarlan a ni. Games hi a hlawhtlin ngei theih nan sorkar department hrang hrangte chu mawhphurhna pek vek nise an ti bawk a ni.

Games hi nakum February ni 20 - 24 chhunga neih tura tih a ni a. Infiamna discipline hrang hrang 11 ah infiamna neih a ni ang. Chungte chu Athletics - 3rd Bn MAP leh Rajiv Gandhi Stadium ah, Badminton - Govt Mizo HSS Indoor Stadiumah, Football - Lammual, Judo - Pitarte Tlang(top floor), Weightlifting - Pitarte Tlang(1st floor), Table Tennis - Kulikawn Indoor Stadium, Boxing - Zarkawt Recreation Centre, Wrestling - Contact Sports Centre(SAI), Volleyball - Govt Mizo HSS Field, Taekwondo - Electric Veng Indoor Stadium leh Hockey - Ramhlun Sports Complex for Women & Republic Veng Field for Men te an ni a. Infiammi leh hruaitu mi 1200 tan thlenna tur atan Referral Hospital, Falkawn ruahman a ni a, Hmeichhe infiammi leh hruaitu 100 vel tan Ramhlun Sports Complex ruahman a ni bawk ang a, SAI Hostel pawh ruahman a ni bawk dawn a ni.

Organising Committee memberte hi an vaiin 38 an ni a. Committee-ah hian Sports Minister Pu Zodintluanga, Parliamentary Secretaries Pu Lalthanzara leh Pu S.Laldingliana te an tel a bawk a ni.