Serchhip District Teachers’ Day Celebration Committee huaihawtin tukin dar 7:30 khan Serchhip Bazar-ah “Ro chhe theilo thiamna min petu zirtirtute I chawimawi ang u” tih thupuia hmangin Teachers’ Day vawi 53-na urhsun taka lawm a ni a, he hun hi District Bawrhsap Pi Juhi Mukherjee IAS, chuan khuallian ni a hmanpuiin Serchhip khawpui chhunga Zirna In hrang hranga zirlaite leh zirtirtute an kal tha hle a ni.

Zirtirtu leh zirlai rual kalkhawm hma a thusawitu khuallian chuan Zirtirtute hlutzia leh chawimawi phu an nih zia uar taka sawiin zirlaite chu an lo puitlin hunah eng dinhmun sangah pawh ding se anmahni chherchhuaktu an zirtirtute theihnghilh ngailo turin a chah a, zirtirtute pawh naupangte an zirtir kawngah thahnemngaih chhuah lehzuala naupangte rilrua dilchhutna, zirbelh zel duhna thinlung leh khua leh tui tha nih duhna thinlung tuh sak tura chahin chutiang bawka anmahni pawh inbuatsaih reng turin a chah bawk a ni. Zirtirtu hmun kilkhawr leh hla zawka awmte chu an mawhphurhna a sang lehzual ani tiin naupangte an enkawlna kawngah thahnemngaihna rilru diktak neih a tul a, Mizoram hmun kilkhawr ber berte ti eng tu chu heng hmuna thawktu zirtirtute hi an ni tiin an inpekna ngaihsanawm a tih thu a sawi bawk.

Tukin inkhawmah hian Serchhip District Teachers’ Day Celebration Committee buatsaih Teachers’ Day au hla “slogan” inziahsiak a lawmman pakhatna dawngtu Pu R.Sanghmingthanga, Medical Quarters, Serchhip hnenah Khuallian in lawmman a hlan a, nizan khan District chhung Cable Operator hrang hrang te kaltlangin District chhung khawtinah District Bawrhsap “Zirtirtute Ni Thuchah” puanchhuah ani tawh bawk a ni.

TukinaTeachers’ Day vawi 53-na lawmna inkhawmah hian Serchhip khawpui huamchhunga Zirna In hrang hrang atangin zirtirtu leh zirlaite an fuankhawm a, Pu Zohmingthanga, DEO leh Pu Lalzuiliana, Headmaster. Govt. JM High School ten fuihna thu an sawi a, Hmingthanzuali, Class-IX, Govt. JM High School in Education Minister Pu Rohluna Teachers’ Day thuchah a chhiarchhuak a, Zirlai zaithiam ten mipui kalkhawmte zaia awiin hun hlimawm tak hman a ni a, Pu C.Lalthanzira, DPC, SSA Mission, Serchhip District-in lawmthu sawina in hnu a khar a ni.

Teachers’ Day lawmna hi hun thumah then niin zingkara inkhawmna hun hman anih bakah hian chhun lamah Zirna In tinah hman a ni a, chawhnu lamah Sawrkar thuchhuak angin Zirna In tinah TV/Radio kaltlangin India Prime Minister in Zirtirtute Ni puala a thuchah ngaihthlak ani bawk ang.