Nimin khan UD&PA Department kaltlanga Integrated Housing & Slum Development Project (IHSDP) hnuaia Cheng 32,59,244 senga sak ‘Lungpuizawl Community Centre’ chu Parliamentary Secretary leh bialtu MLA ni bawk Pu Joseph Lalhimpuia’n a hawng.

Lungpuizawl Community Centre hawnna inkhawm UD&PA Director Pu Zorammuana kaihhruaiah Khuallian Pu Joseph Lalhimpuia chuan UD&PA hnuaiah a bial chhungah hmasawnna ruhrel tam tak tihsak a nih chu a lawmawm hle a ni, a ti a. UD&PA, Sports leh Education Department-te inkarah inkungkaihna tha tak nei chho zel chuan a bik thalaite tan alsawmna tam tak a rawn keng lut zel a ni, a ti. Education leh Sports Department ten MoU ziak felin zirlaite tan sports lamah eizawnna tling theih khawpa chherchhuah dan ngaihtuah mek a ni, a ti. Mizoram District zingah Lunglei District chu ziak leh chhiar hniamna pawl a nih avangin 'Adult Education;-ah tanlak mek a nih thu sawiin Pu Joseph Lalhimpuia chuan zirna bakah thianghlimna leh hriselnaah pawh tanlak chho zel a ni ang, a ti. Khuallian Pu Joseph Lalhimpuia ngenna angin UD&PA Director chuan Lungpuizawl Community Centre-a hman atan plastic chair 100 pek a nih tur thu a tarlang bawk a ni.

Pu C. Lalmuankima, EE, UD&PA Technical Report-a a tarlan danah chuan IHSDP hnuaiah hian Lunglei District chhungah Community Centre 3 sak a ni tawh a, District chhunga hmalakna hrang hrang atan Cheng vaibelchhe 12 ruahman a ni. Mizoram chhung hmun hrang hrangah sports complex, footpath, side drain, over-bridge, gallery, bus & truck terminal leh khawpui chhungte chei that a ni tawh a, mirethei In 500 sak sak a ni tawh bawk a ni.

Lungpuizawl Community Hall hi a vang zawng 36 ft, a sei zawng 60 ft leh a san zawng 20 ft. a ni a, a hnuai (basement) chu a vang zawng 12 ft, a sei zawng 36 ft leh a san zawng 10 ft. a ni thung.