Vawiin chawhnu dar 3:00 khan Serchhip DC Meeting Room-ah District Bawrhsap, District Education Committee Chairman ni bawk Pi Juhi Mukherjee, IAS hovin “National School Safe Programme” hnuaia sensitization programme kalpui dan tur relho a ni a, September ni 15, 2014 a bul tanin October ni 9, 2014 ah a hmawr bawk a ni ang a, he hun chhung hian School naupangte pual inelna chi hrang hrang buatsaih a ni ang.

NSSP Sensitization Programme ah hian Serchhip District chhunga Primary School, Middle School, High School leh Higher Secondary School (Government & Private) zawng zawngte tan inelna chi hrang hrang hetiang hian buatsaih a ni ang :

Primary School - Colouring Competition

Middle School - Painting Competition

High School - Script Writing Competition

Higher Secondary School - Poster with Slogan Writing Competition.

Primary leh Middle School intihsiakna te hi chhawng thuma (School, Sub-Division leh District level) neih a ni ang a, High School leh Higher Secondary School intihsiakna hi chu District-level ah huaihawt nghal a ni ang, intihsiak hun leh a tihdan dan tur kalphung te chu School zawng zawngah hriattir an ni ang a, hetiang hian lawmman pawh ruahman nghal a ni :

Primary School : 1st - Rs. 5000/-  ; 2nd - Rs. 3000/-  ; 3rd - Rs. 2000/-

Middle School : 1st – Rs. 7000/- ;  2nd - Rs. 5000/- ;  3rd - Rs. 3000/-

High School : 1st - Rs. 10,000/-  ; 2nd - Rs. 7000/- ;  3rd - Rs. 5000 ;

Higher Secondary School : 1st - Rs. 15,000/- ;  2nd - Rs. 12,000/- ;  3rd - Rs. 10,000/-

Sub-Division leh District-level intihsiakna a tel tura thlanchhuahte chu an kalna senso leh intihsiakna hmanrua tum sak vek an ni ang.

Hei bakah hian Serchhip khawpui huamchhunga zirlaite tan September ni 30, 2014 hian “Rally” huaihawt a ni ang a, October ni 9, 2014 ah Serchhip DC Conference Hall-ah Sensitization Programme kharna hun ropui taka hman a ni bawk ang.