Vawiin chawhnu dar 1 khan Serchhip DC Meeting Room-ah kumin kumtawp Assembly Election a Serchhip District chhunga duty tur Video Surveillance Team (VST) leh Video Viewing Team (VVT) te tan training buatsaih a ni a, Training hi Pu Andrew H. Lalremruata, MIS, DIPRO, Serchhip in a kaihruai a ni.

DIPRO chuan Video Surveilance Team leh Video Viewing Team te chu Election Commission of India ruahman dan anga din anih thu sawiin kum 2010 atanga bul tan a ni a, Mizoram tan pawh thil thar anih dawn avangin fimkhur tak leh uluk taka inbuatsaih a tul a ni a ti a, VST leh VVT chu Candidate ten Campaign na atana sum an senso zat leh Model Code of Conduct bawhchhiatna a awm leh awmloh vil tur an nih thu a sawi a, an hna chu hna pawimawh tak anih avangin inthlahdah a pawi dawn thu a sawi a, VST leh VVT kalphung tur leh an hnathawh tur te, hnathawh dan tur te zirtirna hun a hmang a ni.

Video Surveillance Team (VST) leh Video Viewing Team (VVT) te hi Election Commission of India thuchhuak angin Inthlanna a Candidate te thil tih dik lo leh dan bawhchhiatna awm thin te vil tur leh chutiang thil thleng record a lo vawng tha tur a din an ni a; Election Expenditure leh Moral Code of Conduct kaihhnawih thil record theih chi reng reng uluk tak leh felfai taka record tura ruat an ni.

Assembly Constituency tinah VST leh VVT hi pakhat tal an awm zel tur a ni a, VST ah hian a tlem berah Official pakhat leh Videographer pakhat an awm tur a ni a, Candidate te sum hmanna bakah, vantlang inkhawm buatsaih ah te Election Commission of India in dan a siamte palzut anih leh nih loh uluk takin an vil ang a, Video camera nen an duty thin dawn a ni.

Video Viewing Team (VVT) ah hian member pathum – Officer pakhat leh Clerk pahnih- an awm tur a ni a, an ni hian VST ten Video recording an siam chu nitin uluk takin an zirchiang ang a, Candidate ten inthlan kaihhnawiha sum an senna emaw, Model Code of Conduct bawhchhiatna emaw a awm chuan rang takin thuneitu te hnenah an thlen thin dawn a ni.

Vawiin Training hi Pu Lalhmansanga, MCS, Election Officer pawhin hmanpuiin, Trainees te chu Election Commission of India hnuaia Deputation a kal an ni tawh ani tih inhre tur leh Election kaihnawih thila an duty chu dahpawimawh ber zel turin a chah bawk a ni.