Vawiin atang hian State Institute of Rural Development & Panchayati Raj (SIRD&PR) te bul tumin Serchhip District chhunga MGNREGS hnuaia Village Level Administrative Assistant (VLA) te tan DRDA Conference Hall, Serchhip ah ni thum awh tur training tan ani. 

He Training hawnna inkhawm, Pu Khawlsiamthanga Khawlhring, Course Director SIRD kaihhruaiah; Pu V.L Remliana  Project Director DRDA, Serchhip chuan hawnna thusawiin, kan thawh hlawhte hlim taka kan lak theih nan kan hnate theihtawpa kan thawh reng a tul a ni, a ti a. VLA te chu MGNREGS hna enkawl thei tura sawrkarin tling a ngaih te an nih ang ngeiin tlin taka an hnate thawk tura ngenin; tlin taka an hna an thawh theih nan training tha neih hi a pawimawh em em a ni, a ti. SIRD hotuten Serchhip District VLA te tana training an rawn buatsaih thei chu lawmawm a tih thu sawiin VLA ten tangkai taka hmang ngei turin a fuih a ni. 

He Trainingah hian  MNREGS hnathawh zel dan tur Ministry of Rural Development in ruahmanna a siamthar hrang hrang te zirho tur a ni a, hemi hmanga Department dangte hmalakna tawiawm dan leh tawh ho dan awm thei te pawh Department dang hotute nen sawi ho a ni bawk ang. 

He training nithum chhung awh turah hian SIRD leh DRDA lama mithiam hrang hrangten zirtirna an pe ang a, Department dang enkawltu officer te nen inkawmhona (interaction) te pawh an nei nghal bawk ang.