Vawiin chawhnu dar 1:00 khan Serchhip District Election Officer leh Bawrhsap ni bawk Pi Juhi Mukherjee hovin a office chamber-ah Systematic Voter’s Education and Electoral Participation (SVEEP) chungchangah meeting neih a ni a, meeting-ah hian Sub Hqrs. YMA, Serchhip District, MZP leh MUP aiawhte an tel a ni.

District Bawrhsap Pi Juhi chuan kumin inthlanpuiah hian tun hma aia vote tla a that theih zawk nan tun atanga tan lak a ngaih thu a sawi a, Serchhip district chu India ram pum puia ziak leh chhiar thiam tamna ber district a nih avangin Election Commission of India pawhin vote tlak tha berna ni thei turin a beisei a, chuvangin a tlem berah 95% tal tla tura beisei a nih thu tarlangin, hemi atan hian NGO zawng zawngte chu anmahni zawn theuha hma lakpui turin a sawm a ni.

He meeting hian vote a tlak that theihna atana mipui zirtirna leh inbuatsaihna pakhat atan Inter Branch YMA Volley Ball Tournament buatsaih nise a ti a, district chhunga YMA branch zawng zawngte an tel kim theih nan Sub Hqrs. YMA Serchhip chu a tul anga hma lo laa ruahmanna lo siam turin a ruat nghal bawk a ni.