Vawiin chawhma dar 11:00 khan Union Minister of State for DoNER, Pu Paban Singh Ghatowar chuan Lawngtlai a tlawh a, Lai Autonomous District Council huam chhunga School building 49 sakna tur lungphum a phum.

Minister hi LADC Building tualah school sakna tur lungphum inkhawm neihpui a ni a, he hunah hian thusawiin DoNER Minister chuan Mizoram hi ziak leh chhiara India ram a State chungnung ber te zing ami in ni a, Lawngtlai District chu Mizoram District zingah ziak leh chhiar thiam tlem berna a ni thung, hei vang hian sawrkar laipui in Lawngtlai District chu zirna lamah sang taka dah chhoh a tum a ni a ti a. Chumi ruahmanna kal zelah cheng vaibelchhe 11.09 senna tur school 49, Primary School 27 leh Middle School 22 te sakthatna tur bul kan tan lehta a ni. Tuna school sak thatna kalpui mek hi a thawhhnihna a ni tawh nghe nghe a ni a ti bawk.

Pu Paban Singh Ghatowar hian NEC hnuaia Mizoram sawrkarin project hrang hrang a kalpui tawh leh a kalpui mekte tarlangin tun dinhmunah Project 127 thawh tawh niin chung zinga project 67 chu zawh fel tawh a ni a, project 64 chu thawh mek niin project thar 67 chiah mek a ni a ti bawk. Heng project thawh mek zingah hian Lawngtlai District chhungah pawh Lawngtlai College sakna cheng vaibelchhe 13.09 senna turte, Lawngtlai khawpui tihchangtlunna Cheng vaibelchhe 11.82 senna tur te, Parva to Chimenosora kawng laihna vaibelchhe 11.52 senna turte, Lawngtlai Bypass road laihna vaibelchhe 10.29 senna tur te, Lungpuighat kawng cheng vaibelchhe 15.45 senga laihna turte, Greater Lawngtlai Water Supply Scheme vaibelchhe 14.50 senga siam tur leh Lai Hostel, Aizawla sakna cheng vaibelchhe 5.75 senna turte a tel a kum reiloteah Lawngtlai District chuan nasa takin hma a sawn dawn a ni a ti. Hei bakah hian DoNER Minister, Lawngtlaia tum hnih rawn kal awm chhun ka nih avangin ka lawm hle a ni a ti bawk.

DoNER Minister rual a kal ve Pu H. Liansailova, Mizoram Finance Minister pawhin thusawiin Lawngtlai Bypass road laihna tura Lawngtlai mipuiten ram a thlawna an pe tur thawm kan lo hriaa, ropui kan tiin entawn tlak kan ti hle che u a ni a ti a. Mipuite nena tangruala hmasawnna thawh chu a sawt bik em em ani tiin Look East Policy a puitlin tak tak hunah chuan rin phak baka nasa in Lawngtlai District hian a hlawkpui a rin thu a sawi lang bawk. NLUP pawh kan ramin hma a sawn phah nasa hle a, kalpui chhunzawm zelna tur pawisa pawh a la tam tawk a ni a ti bawk.

Pu H. Liansailova bakah hian Minister dang pahnih Health Minister Pu Lalrinliana Sailo, Tourism Minister Pu S. Hiato leh Lok Sabha MP Pu CL Ruala ten DoNER Minister hi an tawiawma, DoNER Ministry lam atangin Jt Secretary V.B Pathak leh Director Uma Kant te pawhin an zui bawk.

DoNER Minister hi IAF Helicopter in Lawngtlai Helipad-ah a rawn tuma, hetah hian Lawngtlai Bawrhsap Pu J. Hmingthanmawia, Lawngtlai SP Pu BK Singh, LADC CEM Pu C.Ngunlianchunga leh mi pawimawh dang ten an lo hmuak a. LADC Building tuala school sakna tur lungphum inkhawm hi Lawngtlai Bawrhsap hian kaihruaiin, LADC CEM hian Inlawmna thutawi a sawi a, Pu Hmunhre, LADC Planning Board Vice Chairman chuan Vote of thanks a sawi bawk a ni.

DoNER Minister hian vawiin vek hian Aizawl a pan leh a ni.