Vawiin hi World Disable Day a ni a, he Ni pual hian Serchhip-ah pawh SSA Mission Serchhip District, Shalom Spastic Society leh DC Serchhip tangkawp Chawhnu dar 3:00 khan Serchhip DC’s Bungalow-ah hun hman a ni.

Serchhip-a World Disable Day puala inkhawm ah hian Serchhip District Bawrhsap, Pi Juhi Mukherjee, IAS chuan Disable Person te chu rualbanlo te ni lovin mi bik, kawng hrang hranga danglam bik leh thiamthil danglam bik nei an ni tih sawiin, an zinga hun a hmang ve thei chu nuam a tih thu a sawi a. Pathian in mihring te chu chi hrang hrang leh kawng hrang hrang a danglam, pianphung leh hmel pawh inanglo tak takin min siam tih sawiin, Pathian in min siam ang angah hian kan lawm thiam a pawimawh thu a sawi a. Heng pianphunga danglam bik te danglamna chu sorkar leh tlawmngai pawl te pawhin an hriatpui thu sawiin, an tana sorkar in ruahmanna chi hrang hrang a siam te pawh chhawr tangkai turin a chah bawk a ni.

Serchhip-a World Disable Day puala inkhawm neih hi Pu C. Lalthanzira, District Project Coordinator, SSA Mission, Serchhip District chuan a kaihruai a. Pu H. Vanlalhruaia, Chairman, Shalom Spastic Society, Serchhip pawhin thu a sawi a ni.

Vawiin a Serchhip-a World Disable Day puala hun hmanna ah hian zaithiam zai mawi tak tak ngaihthlak a nih bakah Shalom Special School Serchhip-a zirlai ten an thiam thil chi hrang hrang an entir bawk a. Serchhip District Bawrhsap, Pi Juhi Mukherjee chuan Shalom Special School-a zirlaite hnenah hian Krismas thilpek a hlan theuh bawk a ni.