Vawiin hian Pu Lalremruata Sailo, MCS, Assistant Settlement Officer, Land Revenue and Settlement, Serchhip District chuan Mizoram sawrkar dan dinglai anga ram chhiah hrang hrang pe duh lote chunga hremna awm thei te District chhung mipuite hnena hriattirna thupek a ti chhuak a. Revenue Pass (LSC, Periodical Patta, House Pass etc.,) neitute chu danin a phut anga tha taka chhiah pe turin a ngen.

Thupek chuan, The Mizoram (Land Revenue) Laws, 2013 Rule No. 36 atanga 40 inkara kan hmuh angin Revenue Pass nei chhiah pe lote chuan an chhiah bat tling khawm atanga 20% pungte nen sawrkarah chhiah an pe tur a ni a, chutianga pe tura hriattirna (notice of demand) an dawn atanga thla khat chhungin an pe tla tur a ni. Tin, chhiah pe duhlo (Defaulter) te hi sawrkar thuneitu (DC, Revenue Officers) ten an bungrua lilam sak theihna thuneihna an nei tel bawk a, an bungrua hralh sak tura an singsakna senso paih hnua a chuang la awm atanga an chhiah pek tur te chu lak sak thin tur a ni. Tin, an bungraw lilam sak leitute hnenah thuneituten leina lehkha ( Certificate of Purchase) an pe leh thlap bawk ang, a ti a. Serchhip District chhunga Village Council tin te chu an khaw mipuite hnenah he dan hi chiang taka hrilh hre thin tura beisei an ni a, mipuite pawh sawrkar dan anga a hun taka chhiah pe tura  ngen an ni.

Heng sawrkar dante zawm duhlo te chungah hian Revenue Danbu in a sawi anga khauh taka hmalak zel a nih tur thu Pu Lalremruata Sailo chuan a tarlang bawk.