Serchhip District bawrhsap Dr. Lalrozama, IAS chuan vawiin chhun khan National Talent Search Examination (NTSE) a Mizoram aiawh tur thlanchhuahte zing ami Presbyterian English School, Serchhip a Class-X zirlai panga te chu a pisa ah thingpui a in pui a, Zirlaite hi an School Principal Pu Laldinpuia Pachuau-in a rawn hova, Serchhip DC Office a Officer te pawhin an tel pui a ni.

Bawrhsap chuan zirlaite chu rilru leh thinlung taka lawmpuina leh duhsakna hlan in theihtawp chhuah a mizo hming titha tu ni ngei turin a fuih a, tumruhna nen theihtawp an chhuah phawt chuan thil tih theihloh tak tak a awmlo ani tih hre reng tura fuihin Pathian tihna nen inbuatsaih tura hrilhin zirlaite hnenah hian lawmpuina tangkafai a hlan bawk a ni.

National Council of Educational Research and Training (NCERT) buatsaih National Talent Search Examination hi Pawl 10 zirlaite tana buatsaih niin chawng hnih a kalpui a ni a, chawng khatna chu State Council of Educational Research and Training (SCERT) Mizoram in November ni 7, 2015 khan State Level ah buatsaihin Mizoram aiawh tur mi 25 thlanchhuah an ni a, heng zinga 5 te chu Serchhip atanga thlanchhuah niin Presbyterian English School, Serchhip naupang te vek an ni a, an ni hian April ni 19-22 chhung SCERT, Mizoram ah Coaching an kal ang a, May ni 8,2016 a National Level Talent Search Examination neih turah Mizoram ai an awh dawn a ni. State-level Exam a tling te hian lehkha an zir chhung thla tin scholarship an dawng dawn bawk a ni.

Presbyterian English School Serchhip atanga Class X zirlai State Level Talent Search-a tling te hi Vanlalbiaktluanga s/o Pazawna, Lalrinfeli Millenium d/o JS Lalvuansanga, Malsawmtluangzeli d/o F.Lalhmangaihsanga, Lalduhzuali d/o Biakchungnunga, V. Lalbiaksanga s/o V.Lalfakzuala te an ni.