Vawiin hian Justice Pu Michael Zothankhuma, Portfolio Judge for the State of Mizoram chuan Lawngtlai a tlawh a, Lawngtlai Chief Judicial Magistrate Office a endik bakah Lawngtlaia Court Building sakna hmun tur leh Quarters hmun turte a tlawh a, Lawngtlai Bawrhsap Dr. A. Muthamma, IAS, Lawngtlai Superintendent of Police Pu Lalsanglura leh LADC CEM te nen an inkawm.

Justice Pu Michael Zothankhuma chuan, Lawngtlaiah hian Court Building, Court in a ma puala a la neih loh avangin DC Building pakhat la luah hawh a, mahni puala neih thuai a nih theih nan hma kan la mek a ni, a ti a. Nakin ah chuan Chief Judicial Magistrate mai nilovin Session Judge dah a tul hunte pawh a la awm thei a. Chung hun te thlir chungin LADC hotute leh DC lam te nen a hmun hma te en a, hmalak dan tur ngaihtuah ho tura Lawngtlai tlawh a nih thu a sawi bawk.

Justice Pu Michael Zothankhuma hi Lawngtlai Chief Judicial Magistrate Pu Laldinpuia Tlau, SDPO Pu Tlualaisa Hlychho, SDO Sadaar Pu Lallawmawma, LADC Executive Secretary Pu Lalramenga, District Information and Public Relations Officer Pu K. Saitluanga leh Pu Lalruatkima, President, District Council Court ten an lo dawngsawng a ni.