199/2025-2026

Dated Serchhip, the 16^th April, 2025: April ni 7, 2025 a khawtlang hruaitute leh sawrkar hotute thukhawm chuan Serchhip Auditorium, Field Veng chu mipuite tan a him lo ni a hriain chhiatna rapthlak a thlen hmain thiah ni se, tiin thu an lo dah tawh a. He an thu rel bawhzuiin vawiin khan Serchhip DC Pu Paul L.Khuma hoin DC Meeting Hall-ah Serchhip Auditorium thar sak dan tur an rel a ni.

Meeting hmasain thu a lo dah tawh angin Auditorium hi thiah a nih dawn avangin a thlakna tur sakna tur hmun chu khawtlang hruaitute leh tlawmngai pawl ten lungrual taka ngaihtuahin a tul anga proposal siam ni se, tih chu vawiin hian sawiho a ni a. Auditorium thar sakna tur hmunhma atan rawtna hrang hrang a lut a. Vawiin meeting chuan a hmunhma te zirchiang tur leh zawng turin Site Selection Committee din ni se, tiin an rel.

Vawiin thutkhawma rawtna lut te chu he Site Selection Committee hian uluk takin lo zir chiang se; rawtnaa tel kher lo hmunhma tha zawk an hria a nih pawhin lo endik nghal se, tiin committee chuan a  rel a. Site Selection Committee Chairman atan Additional DC Pu Lalrinzuala chu ruat niin member atan Revenue Department, UD&PA, P&E, PWD, Sub Headquarters YMA, Joint VC, Town Planning leh MJA aiawh te ruat an ni. He Committee hian a rang thei ang berin hmunhma an zawng a nga, an report te chu April ni 30 ah DC hnenah an thehlut a nga, Committee lian zawkin an rawtna te hi a thlir ho leh dawn a ni.