198/2025-2026

Siaha the 16th April 2025: Siaha District Information & Public Relations Officer Pi K Ngosai chuan vawiin khan Mizoram Journalist Association (MJA) Siaha District-te chu an office ah kawmin Press Accreditation Card a sem nghal.

DIPRO Pi K Ngosai chuan Press Accreditation Card dawng MJA member-te chu a lawmpui hle tiin Mizoram pumah Accredited Journalists 136 an awm tih a tarlang a, chúng zingah Siaha District atanga mi 9 in an dawng thei chu a lawmpui thu a sawi.

Accredited Journalist-te chu Mizoram Sawrkar hriatpui thuthar thehdarhtute an ni a, sawrkar pawhin a theihna zawnah a duhsak hle thin tiin mipuite tangkaipui theih tur thu thehdarh kawngah dikna leh rinawmna nena thudik tan tlat ngam turin a fuih a, MJA leh I&PR Department chu hun rei tak ata tawh tha taka lo thawkho tawh thin an nihna angin thawhhona tha zawk a awm zel a beisei thu a sawi bawk.

Siaha District MJA President Pu CZ Hluna pawhin thu sawiin thawhhona tha tak hnuaiah MJA leh I&PR Department chu an lo kal tawh thin a ti a, member te pawh thahnemngai takin ram leh hnam tak thawk chhunzawm zel se a duh thu a sawi bawk. MJA General Conference, Champhai a an kalna report te pein Siaha District MJA te mamawh hrang hrang tarlanna a nei bawk. Pu CZ Hluna bakah hian Pu Jeffrey Khara, Editor Moonlight te, Pu M Baithai, Editor Chhim Aw te leh Pu C Lalramnghaka, Editor Kawleng te pawhin thusawi tawi an nei bawk a ni.

Siaha atanga accredited journalist 9 te hi Daily newspaper editor 6 leh Local cable proprietor mi 3 te an ni. Siaha District atanga accredited Journalist te chu:

1) Pu CZ Hluna- President MJA, Siaha
2) Pu J Jeffrey Khara- Editor, Moonlight
3) Pu T Lalrosiama- Editor, Tipa Express
4) Pu M Baithai- Editor, Chhim Aw
5) Pu V Pawhla- NSV
6) Pu Lalnunkima-HSV
7) Pu B Vanlalhriata- Editor, Siaha Post
8) Pu PT Lalhnehzova-NSV
9) Pu C Lalramnghaka- Editor, Kawleng te an ni.