Vawiin tlai hian Serchhip Bawrhsap Dr. Lalrozama, IAS chuan Serchhip Sub Headquarters YMA leh 10th Assam Rifles ten an buatsaih thalaite tana a thlawna Hindi tawng zirna chu a hawng.

Dr. Lalrozama chuan, zirna lam hawi hmalakna thil chuan min tiphurin min ti hlim thin a, vawiinah Serchhip khaw chhunga thalai Hindi tawng zir duhte tana a thlawna zirna YMA in buatsaih nachang a hria leh a hawnna hun hial kan nei thei hi ka lawm hle a ni, a ti a. District Officer engemawzat in zir ve an duh thu ka hnenah an sawi a, remchangte a awm a nih chuan ngaihtuah sak theih pawh ka duh hle a ni, a ti. Vairengte pela hnathawka chhuak tam apiangin Hindi pawimawh zia an hrechianga, thiam an duh thin a ni, India rama awm India tawng hman pui ber ni bawk si lo thiam ve hi kan tan a pawimawh em em a, an tawng ngeia kan biakte thinlung chu kan tan a inhawng zau bik nge nge thin a ni, a ti. Zir tura inziaklut thalai rualte chu theihtawp chhuaha bei tur leh hlau leh tim hauh lova an thiam chhun chhunte hmang nghal zel turin a fuih bawk.

Serchhip Sub Headquarters YMA President Pu R. Sanghmingthanga pawhin thu sawiin, tuna batch hmasa ber ten hlawk taka he Course hi an hmang a nih phawt chuan neih chhunzawm zel a nih tur thu a sawi a, tunah rih chuan 10 Assam Rifle nen kum 2016 chhung atan chuah inremna an la siam rih a ni, a ti. Pu Sanghmingthanga chuan, YMA Serchhip Sub Headquarters chuan thalaite hmakhua ngaiin sipaia tan tumte tan Pre Recruitment Training te, Career Awareness Campaign te an lo neih tawh thin thu sawiin sipai bikah phei chuan YMA buatsaih training a kal chhuak mi 37 zetin sipai hna an hmuh tawh thu a sawi a, sipai lak dawn hnaihah Pre Recruitment Training hi buatsaih leh a nih tur thu pawh a sawi a ni.

He Hindi Zirna hi Sub Headquarters YMA hnuaia Committee peng pakhat Education & Youth Affairs Committee hnuaia din leh enkawl a ni a, vawiina a hawnna inkhawmah pawh hi he Committee Chairman Pu C. Lalramliana’n a kaihruai a ni.

He Free Hindi Spoken Class hi thla 2 zel awh tura duan chhin phawt a ni a, a batch hmasa berah zirlai 50 inziak lutin an ni hian Thawhtanni leh Zirtawpni inkar nitin tlai dar 4 atanga dar 5 inkarah Sub Headquarters YMA Office ah Class an nei thin dawn a, vawiin tlai atang hian an tan nghal nghe nghe a ni.

Attachment

  • Loading attachment...