Chief Minister Pu Lal Thanhawla'n vawiin khan Neihloh khua a tlawh a, a khaw mipuite nen inkawm hona hun tha tak neiin vantlang inkhawm neih nghal a ni.

Chief Minister Pu Lal Thanhawla chuan Mizo hnam chu Pathian hnam thlan leh Chanchin Tha hril tura koh kan nih angin kawng engkima midangte tan entawntlaka kan nun a ngai a, chuvangin kan thil tih reng rengah Pathian hre chungin lawmna chang hria a rinawmna, taihmakna, dikna leh amah tihna nung nen kan hun leh kan nun kan hman a ngai, a ti.

Hmasawnna reng reng dawng turin kan rilru put hmang, khan ngaihtuahna leh rilru sutthlek te kan inpuahchah leh kan inbuatsaih hmasak a tul tiin Sawrkar in mipui mamawh te hre reng chungin mipui mamawh tak tak phuhruk hmasak chu a ngaihpawimawh ber thu a sawi a. Chutih rualin duhsak leh malsawm tlak ni turin kan awm em tih chu kan ngaihtuah a pawimawh a ni a ti.

Pu Lal Thanhawla chuan hmasawn tur leh duhsaktlaka awm tur chuan Pathian lam tang nih phawt a ngaih thu sawiin amah kan lama a tan chuan kan thil tih a ni emaw Sawrkar scheme leh programme te a ni emaw a hlawhtling thin a ni, a ti. Sawrkar economic programme thar New Economic Development Programme chungchang sawiin Chief Minister chuan NEDP hi sawrkar flagship programme kalpui mek NLUP chhunzawmna tur a ni a. He programme hmang hian tanpui ngai la awm mekte tanpui tur te,NLUP hnuaia hlawhtling zualte tih hlawhtlin leh zual nan te, vanduaina avanga hlawhtling fumfe lo te chhawmdawl nan mithiam ten an duan a nih thu a sawi.

Khawtlang leh ram pa anih anga an khua in kawng hrang hranga hmasawnna a neih theih nan theihtawp a chhuahpui a, hma a laksak a, a ngaihsak thin avangin khawtlang aiawh ten Chief Minister leh Mizoram Sawrkar chungah lawmthu an sawi a. Mirethei leh khawte te a ngaihsakna leh duhsakna chu hruaitu dang tan a entawntlak thu khawtlang hruaitu ten an sawi bawk a. Ram a hruaina kawngah Pathian kaihhruaina dawng zela hriselna tha a neih theih nan duhsakna an hlan bawk a ni.

Neihloh khua hi in 70 bawr vel niin 1995 khan Jeepable road in a pawh a, electric eng chu 1994 ah lut a ni. Chief Minister hian Neihloh khua hi vawi 10 chuang a tlawh tawh a, kawng a tlang hma hian ke a kalin he khua hi a lo tlawh tawh a ni.

Sawrkar flagship programme NLUP phase hrang hrang hnuaia beneficiaries 48 an awm mek a, a pumpuia chhutin NLUP kaltlangin tanpuina sum cheng nuai 34 vel an dawng tawh a. Serthlum huan siam leh ran vulh lam thlang an tam zawk a. Rural Housing hnuaia chhungkaw 11 in rangva bundle 4 theuh an dawng tawh bawk a ni.

Chief Minister in Neihloh thalai te tan Jersey set khat, football pakhat, volleyball pahnih leh net a pe a, khawtlangin a tul a an hman atan silpauline pariat a pe bawk a ni.