No.1008/2021-2022 

Dated Serchhip, the 17th June, 2021: Vawiin hian Serchhip Bawrhsap Pu Kumar Abhishek, IAS hmalaknaa Delhi a inbun Company pathumte Corporate Social Responsibility sum atanga Covid19 dona hmanrua Serchhip District in a hmuhte Health Department hnena hlanna DC Office tualah buatsaih a ni.

Pu Kumar Abhishek chuan, a tir ata vawiin thlenga Covid19 dona lama theihtawp chhuahtu zawng zawngte chungah lawmthu a sawi a. An inpekna zarah Serchhip district chu dinhmun tha takah a ding zel nia a hriat thu a sawi a ni. Hripui thawh hnihna a lo thlen chinah ramin kan tuar nasa hle mai a, a dona hmanrua mamawh pawh a pung zel a, chuvang chuan kan district in hmanrua a mamawhte dapchhuah ve theih beiseiin district health department hotuten kan mamawh an sawite behchhanin Delhi lama a hmelhriat Company te a biak kual thu a sawi a. Kan mamawhna te hriaiin hetiang hian min rawn pe ta a ni. An chungah kan lawm hle a, tangkai taka kan hman ngei ka beisei a a ni, a ti. Vawiinah heng kan thil dawnte hi a la rawn thleng kim lova, tunah Medical lamin hman an mamawh tawh avangin a rawn thleng ang ang te inhlanna kan buatsaih ta a ni, a ti bawk. Tin, tuna CSR min petute bakah hian Company dang pawh a biak thute anni hnen atang pawhin beisei tur a la awm thute sawiin, a tul angin kan la dap chho zel dawn a ni, a ti bawk. Serchhip district mipuite chu covid19 vaccine lak hlau lo tur leh a rang lama lak dan ngaihtuah theuh zawk turin a ngen a, vaccine kan dawn ang angte a semchhuak chak ber nih tum turin mipuite leh thawktute a sawm a ni.

Inkhawm kaihruaitu Pu Lalmuansanga Ralte pawhin, Bawrhsapin CSR a dap tanna a rei tawh thu tarlangin, kan hmu mai dawna kan ngaih laiin kan Bawrhsap Pu Kumar Abhishek te chhungkua, Delhi lama awm mekten Covid19 an tuar ve hlauh mai a, a pa phei chu ICU a dah ngai hialin a awm a, anni ngaihvenin Delhi lamah a chhuk a tul ta si a, chuti ni lo se heng CSR te hi kan dawnna a rei tawhin a rinawm. An chhungkua dam taka a rawn kir san hnuah rawn bawhzui lehin vawiinah a hlawhtlinna hmel kan hmu ta a, a hnathawh hi kan chhuang hle a ni, a ti.

Health Department aiawha dawngtu Dr. Laldawngliana Sailo, CMO chuan, Covid19 dona kawngah Pu Kumar Abhishek chuan a thawhpui tha hle tih sawiin, a thahnemngaihna hian thawktute min tiphura, kan chak phah nasa hle   a ni. A thawhrimna zara kan dawn hmanruate chu kan beisei aia tha leh tam a ni a, kan rilru zawng zawngin kan lawm a ni. A tul ang zelin tangkai takin district chhungah kan hmang dawn a ni, a ti.

Bawrhsap hmalaknaa Covid19 hmanrua Serchhipin a dawn te chu Alumni of Institute for Providing Care and Relief (AIR) Foundation, Chhatarpur, New Delhi te hnen atangin; Surgical Masks piece 2000, Surgical Gloves piece 2000, Sanitizers (1 litre bottle) 500 btls, Pulse Oximeter 100, Oxygen Concentrator 15, Oxygen cylinder 30, Flow meter and regulator 30, Nebulizer 20, N95 masks 1000, Digital thermometer 100 te, JAI Foundation atangin PPE kit 500 leh ACT Grants and Swasth Alliance, New Delhi atangin Oxygen Concentrator 20 te an ni.

Heng zinga Oxygen Concentrator 35 leh PPE Kit 500 te khian Serchhip an rawn thleng tawha, chungte chu vawiinah hian a hlanna buatsaih a ni ta a ni. A dangte pawh khi tunah kawngah an rawn thang mek a, ni hnih khat hnu lawkah an rawn thlen theih beisei a ni. 

Pu Kumar Abhishek, IAS hmalaknaa Serchhip District a hman tur Company pathumte atanga covid19 dona hmanrua hmuhte man zat hi Rs. 40,86,388 (Rs.40.86 lakh) man vel a ni.

Hmanrua inhlannaah hian Pu Stephen Lalrinawma, MPS, SP, Serchhip DDMA members te, Health Department atangin Dr. ZD Lalmuanawma, DMS, Dr. Lalhlunpuii, DSO, Dr. K. Lawmzuala, MD te leh media mite an tel a, Pi C. Laltleipuii, SDO Sadaar in lawmthu sawiin hun a khar a ni.